Heqîqetê îslamî û rayîrê azadîya şaran

Ma Remezanêke bîn dimayê xo verda û kewtî Roşano ke sembola aştî, têduştî û aramîya merdimahî yo. Heqîqetê Îslamîyetî bi xo de hemverê bindestkerdiş, zilm, bêedaletî, heqaret û neheqîyan rûnayîşê aştî, azadî, têduştî, edalet, heq û aramîya merdimahî esas a. Îslamîyet de aşma Remezanî nê semedî ra cayêke muhîme gêna. Aşma Remezanî aşma hetkarî ya, aşma aştî, têduştî û aramî ya. La çi heyf ke ancî teberê xopawtişê werî de ti hetêke de xopawtişê ma nêvirazya. Ma zanê ke na aşme de bawermendan ra tenê xopawtişê werî ra nîno waştişî, bi qasê werî xopawtişê qiseyê nebaşan, fiîlê nebaşan û fikrê nebaşan ra zî yeno waştişî. Bi rocegirotiş empatîya kesê halweşan feqîr û xizanan ser de deyena ro, ezezokîya înan bena kêmî û hestê înan ê hetkarî zêdyena. Yanê roceyê Remezanî tenê roceyê xida nîyo roceyê ziwan, dest, zerrî û fikrî yo zî û ancî xopawtişê nebaşîya bi ziwan, dest, zerrî û fikrî ne tenê semedê aşmêke yo semedê diwes aşmanê serre yo. Ancî xopawtişo ke mîyanê aşmêke de yeno mûsnayîşî lazim o ke aşmê bînan de zî bêro verdewamkerdişî û bibo sey mûsnayîşêke ciwîyînî.

Çi heyf ke sere de zilm û tehdayê desthilatîya Tirkîye ke şarê Kurdî ser de yena domnayîşî, aşma Remezanî de zî zilm û tehdayê heme desthilat û serdestê welatanê ke xo misliman hesebnenê yê şaranê Rochilata Mîyanîne ser de bê mîyanber ame verdewamkerdişî û ancî feqîrî, mehrûmî û bindestî para şaran mende. Herakatê pencikî ke hetê desthilatîya AKP/MHP’î ra aşma Remezanî de ewladanê şarê Kurdî ser de ame destpêkerdişî bi xo zî hembervetişê emranê Homayî yo ke bawermendan rê aşma Remezanî de wacib kerdo.

Desthilatîya na dewlete bi nê herakatê xo yê pencikî yê şarê Kurdî ser de fasîqîya xo moşte ra ke senîn hemverê qedexeyanê aşma Remezanî vecêno. Na desthilatî dimayê serkewtişê çalakgeranê grevê veyşanî bi awayêke dişmintîyêka ebedî ya şarê Kurdî rê û sey ke vaco “ez sondwendîya ke nêverdî şarê Kurdî na dinya de bibo wayîrê weşî û aramîyêke” tê geyra. La nê herakatê înan zêdehî rê o yo ke zerre şarê Kurdî dicneno destek û hemkarîya xaînan a ke danê desthilat û dagirkeranê welatê ma. Amyayîşê Behrem Salihî yê Tirkîye bi xo zî hemkarîya herakatê pencikî îşaret keno. Mîyanê civaka Kurdan de hetêke canfedayê ke semedê xoserîya warê xo, semedê serbestîya ziwanê xo ke Homayî înan rê bexş kerdo la hetê netewdewleta nîjadpereste ra ameyo qedexekerdişî û semedê azadîya şarê xo bê xişûşî canê xo kenê feda heto bîn ra xo roteyê ke semedê menfîetî yan zî xaîntîya xo ra kişte dagirkeran de ca gênê û bi cagirotişê înan ê verê netewdewleta dagirker û nîjadpereste de zerar deyeno ziwan, war û canê şarê Kurdî ro.

Loma eke ma wazenê warê xo dagirkeran ra pak bikerê lazim o ma vernî de nê zihnîyetê xorotan û hemkaranê dagirkeran warê xo ra pak bikerê. Heta ma vernî ro îxanetî nêgîrê zehmet o ke ma biersê azadî û xoserîya xo û warê xo. Rayîrê azadîya şarê Kurdî ra yew zî pakkerdişê îxanetî yê mîyanê xo ra yo. Heqê ti şexs, îdeolojî yan zî partîyêke çinê yo ke semedê menfîetê xo zirar bido war û şarê Kurdî ro.

Dikarî Biecibînî