Metodê neweyî; şer û sîyaset!

Avukatê Rayverê Şarê Kurdî Abdullah Ocalanî badê 8 serran şîyê Îmrali. Pêvînayîşo yewin 2ê gulane yo diyin zî 22ê gulane de virazîya û nê her wirdî pêvînayîşan de peyamê muhîmî ameyê dayene. Raya pêroyî xura paweyê nê peyaman bî labelê dewlete çi waştêne û çi wazena hema zî çewî nêzano. Vindertişê dewlete çi bibo zî vindertişê Kurdan zelal o. Kurdî roja ke zilm ameyo înan ser ra heta nika behsê aşitî kenî û tu wext aşitî ra fek veranêdayê. Ewro peyamo ke Îmrali ra ameyo û tede behsê zaf çiyan beno de zî ma vînenê ke esaso bingehîn hêna aşitî yo û Rayverê Şarê Kurdî Abdullah Ocalanî seba çar perçeyanê Kurdistanî, dewletanê ke wayîrê statuko yê ra destê aşitî derg keno. No vindertiş bingehê xo tarîxê hezaran serran ê merdimayî ra gêno û bi no qeyde yeno ziwanî.

Bi nê bingehî Ocalanî derheqê gelek çiyan de zanayîşan dano. Çiyo en muhîm metodê demo newe yo. Bitaybetî pêvînayîşo ke birayê xo Mehmet Ocalanî de kerd de naye ser de vindeno. Ocalanî xura pêvayîşê avukatan de seba sîyasetî rexneyê xo kerdibî. No pêvînayîş de zî rexneyê xo kerd û behsê metodanê neweyan ê ke gere sîyaset demo newe bivîno kerdo. Grevê vêşanîye hema newe destpê kerdibî; ê wextan de rexneyo en gird bêvengîye rê bî û raşta ci a bêvengî (dayîkî teberê nê rexneyî de yê) heta peynîye dewam kerd. Sey her wext giranîya prosesî kewtibî zindanan ser o. Rayverê Şarê Kurdî na rewşe zî rexne kerd û rexneyo ke kerd de no vatiş zaf muhîm bi; kesê ke zindanan de yê nêeşkenî sîyaset bikerî. No vatiş gere sîyaseto nikayîn de erdlerzêk bivirazo û sîyaset bikewo mîyanê bedelyayîşêko radîkal. Sewbîna yew rayîr çin o. Hemleya ke seba şiknayîşê tecrîdî û rijnayîşê faşîzmî dîya destpêkerdene paştê zindanîyan de şîye û resa netîceyêk. Nika ra pey baro en gird keweno paştê sîyasetî ser o. Sîyaset goreyê bedelyayîşê demî gere no bar hewano û vera faşîzmî de micadeleyêko xurt û hîra bido destpêkerdene.

Bi perspektîfo ke Îmrali ra ame, metodî do bibedelîyê. Çunkî dewlete wazena se bikera û ma mîyanê prosesêko senî ra ravêrenî, çewî nêzano. Aye ra bedelnayîş û kewtişê rayîrêko newe seba proseso ke nameyê ci zî ma nêzanî, zaf muhîm ê. Beno ke rojê roşnîye verê ma de bê labelê çiyê ke nika qewimyenî nênê manaya roşnîye. Her cayê welatî de adir vareno, bitaybetî hêrişê dewlete ke sînorî ser de dewam kenî û amacê ci qirkerdiş o heme kesan erzeno mîyanê şik û gumanan. Aye ra merdim eşkeno vajo ke xoverdayîş û micadeleyî ke esas ê; hema zî bêmabên dewam kenî. Hemleya tecrîd bişikne, faşîmzî birijne xo resna cayêk û nika ra pey nameyê hemleya nikayîne tecrîd birijne û Tirkîye bike demokratîk o. Seba naye zî proseso nikayîn di lingan ser o şino; yew ti ra şer yew ti ra zî sîyasetêko goreyê demî yo. Pêardişê hetanê demokratîkan do no proses de serkewtişêko pîl bîyaro. Û her çi ra mîyanê Kurdan de viraştişê ruhêko newe zî meseleya esasin a. Rojanê vernîya ma do zaf hetan de bedelnayîşan bivirazo. Mîyanê nê bedelnayîşan de vindertişê  Kurdan do zaf çiyan bibedelno.

Dikarî Biecibînî