Vernî ro dagirkerdişê Başûrî bigîrê

Kurdanê Bakurî tecrûbeyanê se serra peyîne ra fam kerdo ke teberê qirkerdiş, înkarkerdiş û çinêhesebnayîşî de polîtîkaya dewlete Tirkîye de ti heqêke înan û welatê înan rê nîno waştişî. Se serre yo ke cografyaya şarê Kurdî hetê eynî pergale ra yena talankerdiş û wêrankerdişî, ziwanê înan yeno qedexekerdişî, tûtî, extiyarî û cinî zî tede her temenî de yenê kiştiş, nefîkerdiş û hepiskerdişî. Helbet hewldayîşê na pergale yo bi nê awayî tenê bi Bakur û şênîyanê Bakurî sînorkerde nîyo bi eynî mexsedî verê xo dana perçeyê bînan ê warê Kurdan zî.

Bicakerdişê Baregehanê xo yê eskerî ke (bi destûrê rayedaranê PDK û YNK) Başûr de dayê ro û bi operasyonê xo yê Rocawanî ser de û desteserkerdişê şaristanê Efrînî bi xo zî fikrê aye yo esasî eşkera ma rê yeno ramoştişî. La bi rewşo ke rayedarê PDK û YNK’î tedeyê ma vînenê ke no mexsedo xetere yê pergala dagirker e qet xemê înan de nîyo û şarê Kurdî û warê şarê Kurdî pîya kenê qurbanê nehfanê xo yê şexsî. Eyro roc beşdarîya sondwendişî yê wezîrê karê teberî Çavûşoglûyî de qet nehfêke Kurdanê Başûrî çinê yo tersê ey zirar û xetereyê pîlan xo de hebêneno. Amyayîşê verendamê Şaredarî yê stenbolî Bînalî Yildirimî yê Amedî û vatişê ey ê sey ‘Kurdistan’ û ‘Dêrsime’ bi çi mexsedî yo semedê sondwendişê Nêçîrvan Berzanî şîyayîşê Başûrî yê wezîrê karê teberî Çavûşoglûyî zî bi eynî mexsedî yo. Çavûşoglû ne ke semedê pîrozkerdişê serektîya Rayvertîya Herêmî ya Hikûmatê Kurdî beşdarê merasîmê sondwendişî yê Nêçîrvanî Berzanî bîyo. Lazim o her ferdêke şarê Kurdî baş bizano ke tek sebebê beşdarîya Çavûşoglû ya sondwendişê verdesteyê xo Nêçîrvanî dagirkerdişê perçeyê Başûrî û verdestkerdişê şarê Başûrî yo.

Waştişê înan o ezelî û ebedî pîya no yo ke şarê Kurdî raştîya înan ra dûrî bifînê, înan sey verdestê (emirqûlê) xo bixebetnê û heme dewlemendîyanê cografyaya înan xo rê raveradno. Eke şarê ma yê Başûrî xo hêvîya nê zihnîyetanê xoperestan verdê go rewşê înan zî rewşê Kurdanê Bakurî wetahîrê nêbo. Hema ke nêbîyo erey wa nê şîyayîşê rayedaranê PDK û YNK’î ra ke kewtê dimayê nehfanê xo yê şexsî ra vacê vinderê. Hetê na pergale ra bi destek û hemkariya rayedaranê Başûrî kayê pîlî Kurdan ser de yenê kaykerdişî. Na pergale hewl dana ke heme destkewtişanê şarê ma yê Başûrî înan dest ra bigîro. Loma lazim o şarê ma yê Başûrî rocêke rewtir vernî ro dagirkerdişê Başûrî bigîrê. Eyro roc Kurdê ke Bakur û şaristananê Tirkîye de yê heme heqanê xo yê merdimahî ra bêpar ameyê verdayîşî ke qiseykerdişê bi ziwanê daye xo înan ra yew o.

Tewr peynî tîma cinîyan a fûtbolî ya şaredarîya Êlihî ke Kayserî Gençlerbîrlîgî dir amî tê het sirf semedo ke bi ziwanê Kurdî qisey kerd rastê êrîşê tîma hemverê xo ameyî. Na pergala ke tehemulê aye ziwanê dayê yê şarê Kurdî rê çinê yo bizanê ke tehemulê aye azadî û xoserîya şaran rê zî çinê yo û wazena şarê Kurdî bi warê xo, cografyaya xo, canê xo û bi hiş û ruhê xo ya xizmetê dewlet, siyaset û pergala aye de bo. Na polîtîkaya înkar û qirkerdişî ne polîtîkaya şexs û partîyan a polîtîkaya dewlete bi xo ya ke se serre yo domêna.

Dikarî Biecibînî