Te xwar!

Di hilbijartinên Şaredariya Bajarê Mezin ê Stenbolê de tifaqa AKP-MHP’ê têk çû û bêguman bandora vê têkçûnê dê di rojên pêş de bêtir xwe nîşan bide. Têkildarî hilbijartinên li Stenbolê gelek tişt hatin gotin û nivîsandin. Ev têkçûna AKP û MHP’ê di medyaya civakî de berfirehî cih girt û hinek kurdan gotin; ‘Te xwar’?

Di nav kurdan de ev gotin ji bo kesên ku zilm û neheqiyê dikin û dema li hemberî kesên qels û lawaz têk biçin ji wan serdestan re dibêjin ‘te xwar’. Ev gotin hezaran caran ji bo AKP’ê derbasdar e.

Kî çi dibêje bila bibêje di hilbijartinên Stenbolê de ên bi ser ketin Îmamoglu, CHP û Tifaqa Millet nîne û ên ku bi wan dan qezenckirin û bi ser ketin tifaqa demokratîk a gelan ku kurdan ji vê tifaqê re pêşengî dikir. Bêguman kurdan bi AKP û Erdogan dan windakirin û kesên vê rastiyê nebînin û berovajî bikin bêîman in. Rastiyek pir mezin derket holê ku bêyî kurdan tu hêz nikare bi ser bikeve. Ên ku heqîqeta gelê kurd nebînin û zilmê li kurdan bikin neçarî têkçûnê ne.

Tevgera Azadiya Gelê Kurd ne tenê di vê hilbijartinê de ev çend sal in ji bo têkçûna faşîzma AKP-MHP’ê têdikoşe û berxwedaneke bêhempa dimeşîne. Pêwîst e mirov vê têkçûna AKP’ê tenê wekî encama hilbijartinekê negire dest û ev encama têkoşîna tifaqa demokrasiyê ya çend salên dawîn e.

Faşîzma AKP-MHP’ê baş dizanin ku heta Tevgera Azadiya Gelê Kurd têk neçe dê nekaribin pergala xwe saz bikin. Ji bo têkçûn û tasfiyekirina tevgera azadiyê di warê leşlerî, siyasî û aborî de hemû derfetên xwe bi kar anîn. Di hilibijartinan de argûmana wan a herî mezin Qendîl, Şengal û Efrîn bû û dijminatiya xwe ya li hemberî kurdan bi awayekî aşkera anîn ziman.

Dîtin ku ji ber van argûmanan di hilbijartinên 31’ê adara 2019’an de têkçûn, di propagandayên hilbijartina şaredariya Stenbolê de argûmanên xwe guherandin, behsa kurd û Kurdistanê kirin. Her wiha xwestin Rêberê Gelê Kurd Abdullah Ocalan wekî amûrekê bi kar bînin. Birêz Ocalan di nameya xwe de nêzîkatî û helwestekek stratejîk nîşan da û dîsa behsa girîngiya çareseriya demokratîk kir. Lê wan xwest vê mijara girîng û jiyanî wekî mijareke rojane bigirin dest û ji bo berjewendiyên xwe bi kar bînin. Lê nekaribun Tevgera Gelê Kurd û gel bixapînin û baş fêmkirin ku Rêberê Gelê Kurd di vê nameya xwe de behsa çi dike.

Hilbijartina Stenbolê ne tenê hilbijartinek e. Vê hilbijartinê têkoşîn û nakokiyên navbera blokan û helwesta hêzên navneteweyî raxist ber çavan. Piştî vê hilbijartinê dewlet û hêzên siyasî ji niha ve ketine qeyraneke siyasî û ji vê qeyranê çi derkeve hêj ne diyar e. Lê tiştekî diyar bûye heye ku tu hêz û kes nikare bêyî kurdan planan bike û gavan biavêje.

Dikarî Biecibînî