Vera şerî îradeyê çareserîye

Nê çar serranê peyênan de welat de bê rojdemê şerî rojdemêko bîn çin bi. Esasê xo de şer qet nêvindertibi labelê prosesê nabênê serranê 2013 û 2015î, hetê raya pêroyî ra sey qedîyayîşê şerî ama vînayene. No ewnîyayîş hetêk de ewnîyayîşo en raşt bo zî cayêko sey Rojhelato Mîyanênî de raştbîyayîşê ci bi şik û guman o. Xura Wisarê Ereban ravêrtibi û Sûrîye de şerêk destpê kerdibi. Yanî proses hêna mîyanê şerêk de virazîyabi. Kes bawer nêkerdêne ke şerê Sûrîye endêk dewam biko û xo de rijyayîşêko hendê xidarî bîyaro. Şîrovekarî sere de sey perçeyêka Wisarê Ereban şîrove kerdibî, aye ra ê zî rayîrêko winasî derg texmîn nêkerdibî. Wexto ke Tirkîye de behsê çareserî bîyêne; Sûrîye de şerêko xidar bibi: El-Nusra dima ra DAIŞ û sewbîna gelek rêxistinê bînî yê kovane, heme hetê Sûrîye de bitaybetî zî Rojawanî de hêrişanê xidaran kerdêne. Kurdî seba ke xo nê hêrişan ra bipawî û mîyanê alozîya Sûrîye de xo rê pergalêka newe awan bikî kewtî mîyanê kar û xebatêka pîl. Hetêk de yewîyê pawitişî heto bîn de meclîsê îdareyî yê komelî nayê ro û bi no qeyde Rojawan de bîyê hêzo serwer. Bi bedelanê giranan sere de vera El-Nusra dima ra zî vera DAIŞî şerêko xidar û serkewte ramitî. Rojawan de nê çiyî qewinyayêne, Bakûr de zî sere de prosesê çareserîye bibi dima ra no proses bi destê îdarekaranê Dewleta Tirkî erzîya dolaba cemedî. Badê prosesê çareserîye Bakûr de bi konseptêko newe şerêk dîya destpêkerdene û nêzdîyê çar serrî yo ke şer dewam keno. Senî ke rewşa Sûrîye sey alozîye yena daşinasnayene, a Tirkîye zî wina yena vînayene. Tirkîye bi polîtîkayanê xo yê ke dişmentîya Kurdan ser o ramnena xo resna na rewşe û her roje alozîya mîyanê Tirkîye hêna bena xorîne.

Nika demêko derg ra dima seba meseleya Sûrîye nîqaşê çareserîye benî û heme hetî mîyanê nê nîqaşan de cayê xo girewtî. Hezê hegemonîk bi tewrêk kenê ke meseleya Sûrîye safî biba labelê her yew xo rê menfeatanê xo dima zî vazdanî. Û nika sey çend aşmanê verênan nîyo, heme hetî waştişanê xo hêdî hêdî eşkera kenî. Çiyo en muhîm zî heme şar û bawerî şexsê şarê Kurdî de temsîlê xo vînenî û naye çiyêko kêmî nîyo. Kurdî sey îradeyê çareserîye vera heme vindertişanê xiraban senî ke şer de xo ver dabî mase de zî seba çareserîye xo ver danî. No îrade tena Rojawan yan zî Bakûrê Sûrîye de ney heme perçeyanê Kurdistanî de eynî yo. No îrade, îradeyê Rayverê Şarê Kurdî Abdullah Ocalanî yo. Rayverê Şarê Kurdî seba çareserîya problemanê Rojhelato Mîyanênî zaf rayan pêşnîyazanê muhîman kerd. Labelê tu dewlete yan zî hezî goş nêda nê pêşnîyazan û alozî her ke şîye hêna bîye xorîne. Seba ke Rojhelato Mîyanênî de aşitî ser o çareserîyêk bêra vînayene gere îradeyê çareserîye yê Kurdan ke Rayverê xo ra gênî bêro vînayene û heqê heme mazlûman bêro dayene.

Dikarî Biecibînî