“Rayîro hêrîyin” û şero xidar!

Demêko krîzin ra ma ravêrenê. Her roje nîqaşê cîya-cîyayî yenê kerdene. Nê nîqaşan ra nîqaşo en muhîm rayîro hêrîyin o. Nîqaşkerdişê rayîro hêrîyin cayêko sey Tirkîye de raşta ci ferz o û gere heme kesî dorê nê nîqaşî de bêrê têhet û behsê fikranê xo bikerî. Labelê no nîqaş lokal maneno û tena hetê tayê kesan ra yeno kerdene. Rayverê Şarê Kurdî Abdullah Ocalanî 20 serre verê cu behsê rayîro hêrîyin kerd û heme beyanatanê xo ke tede behsê aşitîye keno de, esasê xo de hêna behsê rayîro hêrîyin keno. Gelo çira rayîro hêrîyin?

Gama ke behsê rayîro hêrîyin beno zaf çiyî yenî vîrê merdiman. Kesê ke pawitişanê Rayverê Şarê Kurdî Abdullah Ocalanî nêwendî, do sere de Serekwezîro verên ê Îngilistanî Tony Blair bêro vîrê înan. Çunkî serranê 90’an de Îngilistan de meseleya mîyanênî ameyêne safîkerdene û eynî wextî de behsê bedelyayîşê pergale bîyêne. Ê wextan de Tony Blairî meseleya rayîro hêrîyinî eşt rojeva dinya. Hetêk pergala Rûsya ya bi nameyê reel sosyalîzmî heto bîn de zî pergala Amerîka ya ke hema zî dinya de serwer a kapîtalîzm, bibî. Badê rijîyayîşê pergala Rûsya nîqaşê winasî ameyê kerdene û Tony Blair vera nê wirdî pergalan de behsê pergala ke do hêna binê pergala kapîtalîzmî de bêra awankerdene kerdêne û tira vatêne rayîro hêrîyin. Rayîro hêrîyin seba ê wextan îxtîyacîyêk bi û gelek dewletî sey Îngilistanî behsê rayîro hêrîyinî kerdêne. La tu nîqaşê înan teberê kapîtalîzmî de nêbî.

Nika, nîqaşo ke PKK û Rayverê Şarê Kurdî Abdullah Ocalanî nê 20 serranê peyênan de Kurdistan û Rojhelato Mîyanên ser o kenî, seba hema dinya rayîro hêrîyin esas gênî. Çunkî pergala ke bi paradîgmaya Rayverê Şarê Kurdî do bêra awankerdene seba heme şaran û bawerîyan a. Do mîyanê na pergale de heme kesî bi rengê xo ca bigîrî û bieşkî xo temsîl bikî. Her çiyî ra ver gere sere de ma goş bidî Rayverê Şarê Kurdî û ey fam bikerî. Eke ma Rayverê Şarê Kurdî fam nêkî, ma do nêeşkî behsê rayîro hêrîyin bikerî. Aye ra nîqaşê ke benî gere bi Îmrali bibî; seba aye zî gere rayîrê pêvînayîşê Îmrali bi temamî abibî. Rayîro hêrîyin do bi no qeyde hêna zêde bêro famkerdene û bikewo mîyanê cuya ma.

Nîqaşê rayîro hêrîyinî hetêk de şerêko xidar zî hetêk de dewam kenî. Dewleta Tirkî seba ke vernîya na pergala ke nika hetê zaf kesan ra yeno nîqaşkerdene bigîra; bi heme îmkananê xo hêrişan kena. Vera nê hêrişan de xoverdayîşêko zaf pîroz yeno dayene û bi nê xoverdayîşê demokrasîya ke do biba bingehê rayîro hêrîyinî yena pawitene. Hêrişê ke Başûrê Kurdistanî ra benî bi nê armancan benî. Xoverdayîşê PKKyî xeta rayîro hêrîyinî paweno û gere wayîrê nê xoverdayîşî bivejîyo. Wayîrvejîyayîşê xoverdayîşî seba sibarojê heme welatî zaf muhîm o. Eke Kurdî û dostê Kurdan seba xo edalet, azadî û aşitî wazenî gere her çiyan ra ver biewnî Xakurkê û uca ra bibî vengêko pîl.

Dikarî Biecibînî