aram

Îxanet ruh dano dagirkerî

Dewletêke dewan, koyan û şaristananê dewletêke bîne bi teyaran bombevaran kena, artêşe xo ya eskerî û ya îstixbaratî erdê aye de bi ca kena ti vengêke rayedaranê dewleta ke welatê aye ameyo bombevarankerdişî û erdê aye ameyo dagirkerdişî ra nêvecêno. Ancî hetê eynî dewleta ra wargeha penaberan ke qaşo binê ewlehîya Neteweyê Yewbîyayî de yê bi teyaran yena bombevarankerdişî, la ti bertekêke yan ti hesêke Neteweyê Yewbîyayî ra nêvecêno.

Artêşa Tirkîye hîrê aşmî yo erdê Iraqî û dewan û koyanê Başûrî bombevaran kena vengêke rayedaranê hikûmatê Iraqî ra nêvecêno, eynî artêşe wargeha penaberan a Mexmûrî bi teyaranê xo bombevaran kerde, ti vengêk Neteweyanê Yewbîyayan ra nêvecya û bi bêvengîya xo pay da hiqûqê xo ser û pelexna. La ecêbê serê ecêban, sosretê serê sosretan zî no yo ke na artêşa êrîşkare bi dawet û destûrê rayedaranê PDK’î ke xo rayedarê Kurdan hesebnenê kewta Başûr û dest bi qirkerdişê Kurdan kerdo.

Wexta ma anênê tarîxe vîyartî ra heta rocê eyroyî pratîko ke PDK’î moşto ra merdim vano herhalde wexta statu deyawa perçeyê Başûrî rolêke wina deyayo na partî ke heta destê aye ra bêro îxanet ro şarê Kurdî bikero. Heta rolêke wina ke dagirkeran zêdehî rê zerar bido yewîtîya şarê Kurdî ro û înanzêdehî rê sînoranê dagirkeran bipawo. Her çiqas dagirkeran welatê ma bi çar sînoran têra kerdo  zî ey her awayî mojnenê ra ke Kurdî heme yew ê û bi eynî awayî nizdê înan benê. Belkî tay çîke erênî nizdê îxanetkaran û nokeran benê, la a nizdahîye înan zî heta cêke ya. Wexta bi paştdayîşê îxanetkar û nokeran biersê armancê xo qet nêanênê hesranê înan ra zî.

Eyro hemverê bombevarankerdişê koyan û dewanê Başûrî bêvengmendişê rayedaranê Iraqî zî, Başûr de bicabîyayîşê artêşa Tirkîye zî vecêno eynî beyrayî, dijminatîya hemverê şarê Kurdî û destkewtişanê şarê Kurdî. Na rewşe de wexta ma anênê PDK ça ca gêno çi heyf ke kişta dagirkeranê welatê ma de ca gêno. Hem zî ne bi limtiş bi eşkera. Anêno zerrey çimanê şarê Kurdî ra û xencere îxanetî bedenê înan û welatê înan de daçikneno. Eke îxanetêke bi zanayîş û bi pergal nêbo êrîşkarîya ke Tirkan şaristanê xo yê Trabzonî de turîstanê Başûrî ser de pêk arde tenê bes o ke PDK fam bikero ke Artêşa Tirkîye bi çi mexsedî Başûr de bi ca bena, yan zî yena bicakerdişî. Bi raştî bûyere Trabzonî zî ma hetêke verdê wextê referandûmê xoserîye de ke Başûr de deya ro bertekê rayedaranê dewleta Tirkîye yê hemverê waştişê xoserî bes ê semedê ke PDK mexsedê înan bivîno, la sey ke min va eke îxanetê înan bi zanayîş nêbo bes o. Xo ra şarê Kurdî bi şahid ke hemverê astengkerdişê xoserîya Başûrî ya hetê rayedaranê dewlete Tirkîye ra zî PDK heme reyan zêdehîrê nizdê aye bi û tedir kewt mîyanê têkilîyanê ke zerarê pîlan danê şarê Kurdî welatê înan ro.

Helbet derdê Kurdan tenê îxanetê partîyêke nîyo. Îxanetê şexsêke ra bigî heta ê partîyan ra her wext zeraro tewr pîl bi îxanet deyayo şarê Kurdî û welatê înan ro. Rûnayîşê sûnoran û dagirkerdişê her çar perçeyan zî, welatê ma de bicabîyayîşê artêş û partîyanê dagirkeran zî, hepiskerdiş û kiştişê şarê Kurdî zî, verdewamkerdişê bindestî, êsîrî û bênasname û bêziwanmendişê ma zî temam bi hemkarîya xaîn û xoroteyan pêk yeno. Ayo ke ruh dano dagirkeran îxanet bi xo yo. Heta ke ma îxanetî mîyanê xo ra pak nêkerê go eynî rewş verdewam de bo.

Dikarî Biecibînî