Tahîr Elçî, Wedat, Eyaz, Nûpelda û Qedera Cografî

Roco ke welatê Kurdan hetê miletê bînan ra ameyo dagirkerdişî û bi destê înan û emperyalîstê bînan ê dinya ra ame çar perçekerdişî heta rocê ma yê eyro yî bi se hezaran tûtî, cinî, ciwan û extîyarê Kurdan hetê dagirkerê serdestan ra ameyî qirkerdişî û hema zî rast ro eynî qirkerdişî yenê. Bi qasê kiştişê Wedat Ekîncî ke 1’ê Tebaxa 2019’ine de Robaroka Colemerge de hetê eskeranê desthilatî ra ame kiştişî vatişanê Walîyêke desthilatî zî rayêke bîne nizdahîye na desthilatî ya hemverê şarê Kurdî da ramoştişî. Vatişê Walîyê desthilatî yê Colemerge ke zerreyê kê Wedatê tûtî de ardî ziwan kilmeya bûyeranê sey 28’ê Temûza 1943’an de Qelqeliya Wanî de pêwa tûtî û extîyaran wa kiştişê 33 dewican , 28’ê Kanûna 2011’ine de bi bombevarankerdişê 34 ciwan û tûtanê Roboskî, 28’ê Teşrîna 2015’ine de bi kiştişê Tahîr Elçî ke Pawtoxê aştî û heqanê merdimahî bi, 15’ê Temûza 2019’ine de Dêrsime de bi kiştişê Eyaz û Nûpeldaya qickeke û tewr peynî zî 1’ê Tebaxa 2019’ine de bi kiştişê Wedat Ekîncî ke tûtê cerdevanêke ke bi serran sîlehkarî û xizmetkarî dewlete rê kerda bi.

Vatişanê Walî de çekûya tawr ecêb e çekûya ke kiştişê lacê înan sey ‘qedera cografî’ arde ziwan bî la her çekûya ey bi serreyê xo sosretêke bi. Ka ma biewnîyê nê rayedarê dewlete hewl da malbata Ekîncî bi emranê dewlete yê senînan înan dagirkeran rê zêdetir sadiq bikero.

Walî vano; ‘Yanê wexta ti na cografya de bicuyê buyerê newînî zî virazênê.’ Akerdişê na çekû çi yo? Dewleta desthilate bi fekê nê rayedarê xo vana ke cografyaya şima dewlemend a û bi seyan serran o çimê ma dewlmendîya ser erd û binerdê aye de yo. Ma wazenê şima na cografyaya xo ra vecîyê bi temamî teslîmê ma bikerê. Heta şima fek nê warê xo ra verra nêdê go kiştiş bibo qedere şima.

Vano; ‘Tabî gere ma vernîde gorey qanûnan tê bigeyrê’ bi na çekûye dano zanayîşî ke goreyê qanûnanê dewleta ra zî para Kurdan kiştiş kono

Vano; ‘Şima Eşîre Gerdî dewlete xo rê zehf sadiq ê.’ Yanê wazena ma koyanê şima, bax û beçeyanê şima, heta dewan û şaristananê şima biveyşinê, ser de zî ma qestê canê şima bikerê û wexta hesabê ma bêro ma şima ra canê şima zî bigîrê gere şima her wext ma rê yanê dagirkeranê warê xo rê sadiq î bê û îxanetkarê war û şarê xo bê.

Vano; ‘Şima en zêde esker û cendirmanê ma rê hetkar ê’. Bi na çekûye bi înan dano qebûlkerdişî ke ey şiqas zêde paştî bidê artêşe desthilatan, çiqas înandir zêde hetkarî bê zî go rocêke sîlehê na artêşe ro înan zî ageyro û bi hetkarîya înan bi xo go ewldanê înan zî bikşê. Yanê merdim eşkeno vaco çi heyf ke bi qasê eskeranê na desthilatî para eşîra Gerdî zî qetilkerdişê Wedatî de esta.

Vano; ‘Merdimê ke ma en zehf îner ra hes kenê û pêbawer ê Eşîre Gerdî ya, cayêke îne taybet verê dewlete de esto’. Yanê dano zanayîşî ke bi qaso ke qestê canê înan bikerê înan ra hes kenê û bi înan bawer ê ke înan ra roc yewî bikşê zî ey go hetkarîya xo ya desthilatan rê bidomnê loma cayêke înan taybet esto.

Vano; ‘ Go na yewîbînî û yewîtîya ma û şima etya ra tepya zî verdewam bikero’. Yanê şima go vatişê ma yê ‘qedera cografî’ qebûl bikerê û vacê dayîş û girotiş pîya bi emrê dewlete yo û bi eynî awayî hetkarî û paştî bidê kiştoxanê ewladê xo Wedatî.

Dikarî Biecibînî