Azadîya Welat E Rojnamî De Cuwîyêno

Vatişêke Efrîkayîcan esto vanê ‘heta ke şêrî estaneke xo nênûsnê ma neçarê ke estanekanê seydvanan goşdarî bikerê’. Her çiqas çapemenîya Kurdî bi rocnameyê Kurdistanî 121 serre verî dest pê kerd zî şarê Kurdî hetê dagirkeran ra bi desan serran bê çapmenî û bê rocnameyan ame verdayîşî û neçarê goşdarîkerdişê estanekanê dagirkeran ame verdayîşî. La dimayê serranê newayan ra tepya şêranê Kurdan pênûsa dagirkerê seydvanan şikite û dest bi nûştişê estanekanê xo yê raştînan kerd. Helbet dagirkeran zî tehemulê nê destkewtişê muhîm ê şêranê Kurdan nêkerd û heme awayî zext û zordarîyê xo înan ser de ceribnayî. Her ke înan zext û zordarîyê xo zêdnayî şêranê Kurdan zî pênûsê xo zêdnayî. Dimayo ke 22’yê Sibata 1992 de rocnameyê Welatî ke beyraqe rocnameyê Kurdistanî dewr girotebî û sey rocnameyêke hewteyîn weşêyayne ziwanê Kurdî rê zî bi sey dibistanêke. Helbet a mîyanbere de êrîşê seydvananê dagirkeran zî ey ser de domyayne.

Beyraqe rocnametîya Kurdî 15’ê Tebaxa 2016’ine de deya Azadîya Welatî û o roc ra tepya bi awayêke rocane çapemenîya Kurdî bê mîyanber amî domnayîşî û eyro zî beyraqe çapamenîya ma bi destê E Rocnameyî yena têşanayîşî. Sey ke yeno zanayîşî rocanemyo Kurdî yo dîjîtal E Rocname dimayê rocnameyanê sey Azadîya Welat, Rojeva Medya û Welatî mîyanê hîrê serrî de rocnameyo çarine yo ke weşanê xo bê mîyanber domneno. Sey ke yeno zanayîşî rayîrê domnayîşê weşangerî û çapemenîya Kurdî de zor û zehmetî û cirmê giranî estê la bi nûştoxan û vilakerdoxanê xo ya, bi muxabîran û nobedaranê xo ya kedkaranê çapemenîya Kurdî ra tu yewêke hemverê zextanê dagirkeran serreyê xo nêtewêna û bi keda înan heta rocê eyroyî çapemenîya Kurdan amîya.

Nê rayîrê bi meşaqetî de Zanayê Kurdan Apê Mûsayî ra bigî heta rocamevan Evîn Bûldan e bi desan tenî ameyê qetilkerdişî yan zî ciwîyînê xo dest ra dayo, bi seyan tenî ameyê hepiskerdişî, vecyayê koyan yan zî teberê welatî la ancî têkoşîna înan cayê xo ra amîya verdewamkerdişî û go etya ra tepya zî bêro verdewamkerdişî. Serrgêrîya 13. yê Azadîya Welatî de wa rayêke bîne seydvanê dagirkerî fam bikerê ke şêrê Kurdan pênûsa xo çiray nêdanê ro û go şarê xo neçarê goşdarîkerdişê estanekanê seydvanê dagirkeran ke estbîyayîşê şarê înan înkar kenê, înan çinê hesebnenê û ziwanê înan qedexe kenê û yê xo ro înan ferz kenê nêverdê. Wa bizanê ke pênûsa şêran roc bi rocîdir xurtîrê bena û ziwanê înan zî tedir xurttir beno. Helbet eke şarê Kurdî wazeno pênûse înan û ziwanê înan zêdetir aver şêro lazim o bi heme hetî ya paştî bidê çapemenîya xo. Eke ma nêwazenê estanekanê seydavanan ê zûrîn, xelet û înkarkaran goşdarî bikerê lazim o ma qiwet bidê pênûsa şêranê xo.

Bi hêvîya ke heme rayan û heme serran xurtîrê bêro verdewamkerdişî rayêke bîne Serrgêrîya 13. yê Azadîya Welatî ke eyro bi nameyê ‘e Rojname’yî bi awayêke dîjîtalî weşanê xo verdewam keno ro heme xebatkaranê rojnameyî, ro wendoxan û heskerdanê ziwanê Kurdî pîroz bo.

Dikarî Biecibînî