Çalakîya lêşine û waştişê dewlete!

Dewlete bi kerdenanê xo yê nikayînan kena ke vernîya sîyaseto ke vera aye de xo ver dano, biqedîna. Waştişê dewlete yeno famkerdene. Raşta ci HDP tena xo ver dano û gere her çi ra ver, vernîya HDPyî bigîra. Aye ra dest nana şaredarîyan ser o û gamanê ke hiqûqî nîyê erzena. 4 serranê peyênan de Tirkîye de sîyaset binê erdan de yo û kesêk nêeşkeno sîyaset bikero. HDP keno ke na rewşe berteraf bikero û seba heme şaranê ke no welat de cuyenî sîyasetêko raşt bikero. Naye tena hetê HDPyî ra yena kerdene û semedo ke HDP, zafê Kurdan zî temsîl keno hêna zêde yeno hedefkerdene. Hikûmetê AKPyî û Serekê ci Erdoganî, heme kerdenanê xo dişmentîya Kurdan û qedînayîşê sîyasetê HDPyî ser o kenî; na rewşe serranê peyênan de hêna zêde xo erzeno verê çimanê  heme kesan û keno ke Kurdan zî sîyasetê HDPyî zî çin bikero.

2015î ra nata sîyaset mîyanê awêka lêşine de yo û asnaw keno. Kesê ke na lêşinîye nêvînenî zaf ê, herinda ke lêşinîye bivînî behsê pakîya awe kenî û kenê ke heme kesî mîyanê a awa lêşine de bo. HDP bi sîyasetê xo ke heme şaran temsîl keno û derdê heme kesan kerdo derdê xo, rayîrî ra şono û keno ke lêşinîya mîyanê welatî biqedîya. Seba ke no rayîr ser de şono, raştê zaf astengîyan yeno û îradeyê ci nêno şinasnayene. Hemserekê verên ê HDPyî Fîgen Yuksekdag û Selahattîn Demîrtaş hema zî zindanan de yê. Nêzdîyê 10 parlamenterê HDPyî zindanan de yê. Nê kesî sey îradeyê şarî erzîyayî zindanan û hema zî serbest nêameyê veradayene. Waştişê şarî serbestveradayîşê îradeyê înan o labelê waştişê  dewlete çinkerdişê  îradeyê şarî yo.

Dewlete eynî polîtîkayan de israr kena; tayînkerdişê qeyûman bîyo sey karê esasî yo dewlete. Sey demo verêne no demo newe de zî qeyûmî ameyê tayînkerdene. 3 şaredarîyanê girdan rê; Amed, Mêrdîn û Wanî rê qeyûmî tayîn bîyê û 20 rojan ra zêde yo ke vera tayînkerdişê qeyûman de çalakîyê şarî dewam kenî. Şar îradeyê xo canêverdeno û seba ke şaredarîyanê xo peyser bigîro her roje lingan ser de yo. Labelê dewlete seba ke vernîya nê çalakîyan bigîra û HDP bitemamî krîmînalîze bikera gamanê lêşinan erzena. Bi hetkarîya dewlete tay keyeyî verê Hemserekîya HDPyî ya Amedî de ameyê pêser û dest bi çalakîyêk kerdî. Keyeyî gedeyê înan ke şîyî koyî û kewtî zindanan wazenî. Bi no qeyde HDP ke tu eleqeya ci şîyayîşê koyan de çin o, krîmînalîze kenî û benî perçeyêka polîtîkaya lêşine ya dewlete. Nê keyeyî baş zanî ke tu eleqeya HDP û gureyo ke ê dima yê çin a. Eke laj û kênayê nê kesan halê keyeyanê xo bivînî do se bikî? Zindanê Bolu de Mecrun Akkoyunlu çalakîya dayîka xo ver o xo întîxar kerdo û wedarîyayo nêweşxane. Sey Mecrunî laj û kênayê bînî do se bikî, çew nêzano. Labelê gere na polîtîkaya dewlete ya lêşine baş bêra famkerdene. Dewlete bi na polîtîka wazena bitemamî HDPyî hedef bigîra û pana, naye ver o gere her çi ra ver HDP rayîrêko zelal xo rê virazo û na polîtîkaya lêşine puç bivejo.

Dikarî Biecibînî