Cayê çareserîye kamca yo?

Hewteyêk ra zêde yo verê awanîya HDPyî ya Amedî de çalakîyêka lêşine esta. Keyeyî ke bi waştişê dewlete uca de ameyê pêser, her roje çapemenîya Tirkan de ca gênê û bi no qeyde kenê ke HDP bikewo hedefê dewlete. Polîtîkaya nikayîne ya dewlete xo beyanatanê  îdarekaran de dana teber; Wezîrê Karê Zerrî Suleyman Soyluyî, beyanatê xo yê ke verê awanîya HDPyî de dayî, padayîşê  HDPyî ard vîrî. Soyluyî estbîyayîşê na çalakîye û padayîşê HDPyî ard têver. No nêzdîbîyayîşê Soyluyî ra zî aseno ke HDP rojanê ameyenan de, do raştê xirabîyan bêro. Dewlete bi heme îmkananê xo şina HDPyî ser o.

Sîyasetê AKP-MHPyî heme hetan ra şerî ser o yo û waştişê înan qefelnayîşê rayîran o. Rayîrê çareserîye û aşitîye bi destê nê sîyasetî yenî padayene. Wazenî îmkanê  çareserîye orte ra wedarnî û tena rayîrêk biverdî; o zî şer… Nika nê sîyasetî ser o do senî merdimî xo ver bi çareserîye biancî? Bi nê waştişan ciwanê Kurdan senî bawerîya xo çareserîye rê bîyarî? Nê persî bes ê. Vera nê persan de cewabêk tena esto yan zî rayîrêk tena; o zî koyî/şer… Nika her çi ra  ver gere nê keyeyî ke verê HDPyî de ronişteyê baş bizanî ke raşt o; cayê çareserîye HDP yo labelê qasê HDPyî tu hêzêko bîn wayîrê îradeyê çareserîye nîyo. Aye ra sere de ê keyeyî dima ra zî rayê pêroyî yê Tirkîye verê xo tadî HDPyî û waştişanê xo, yê HDPyî de bikerî yew û wayîrê îradeyê çareserîye bivejîyê.

Dewlete no îrade seke qet çîn o, hesibnena. Seba ke hesabê dewlete heme şerî ser o yo no îrade nêvînena. Aye ra planêka winasî kerda û wazena HDP krîmînalîze bikera. Vera na plane de gere hetê HDPyî ra sîyasetêko raşt bêro kerdene. Mîyanê şarî de gere hîşyarîyêk bêra ronayene û eke na hîşyarîye nêra ronayene sibaroj qet weş nêaseno. Eke şar nêkewo mîyanê na hîşyarîye vera plananê dewlete de do HDP tena bimano; sey 2016î, senî ke qeyûm erzîyayî şaredarîyan ser o û şar wayîrê şaredarîyanê xo nêvejîya, do wayîrê  HDPyî zî nêvejîyo. Naye çiyo en xirab o. Gere na xirabî ney, wayîrvejîyayîş xo bimajno ma.

Cayê çareserîye HDP yo la tena bi HDPyî meseleya Kurdî safî nêbena, gere dewlete zî o îrade qebûl bika û raştîya nê welatî bivîna. Rayverê Şarê Kurdî Abdullah Ocalanî, pêvînayîşê xo yê peyêne de behsê aqilê dewlete kerdibi û vatibi nika aqilê dewlete şerî ser o yo. No vatişê Ocalanî û kerdenanê dewlete yê nikayînan mojnenî ma ke sibaroj de çareserî ney şer hêna zêde vernîya ma de yo. Vera na polîtîkaya dewlete de sîyaseto en raşt mîyanê şarî de beno û aye ra Ocalanî behsê sîyaseto ke şarî reyde do bêro kerdene keno. HDP û hêzê bînî yê ke Kurdî û muxalîfî tede yî se beno wa bibo gere mîyanê şarî de bê; îrade û cayê çareserîye bimajnî şarî.

Dikarî Biecibînî