Dinya bîya yew e kurdî çî rê nêbenê yew î?

Heta verê dagirkerdişê Efrînî yê hetê desthîlatîya dagîrker e tenê min vatêne pergala Tirkîya de kam partî bena wa bibo a, b, c yan zî d ferq nêkeno wexta vatiş bêro serê heqê medimahî yê şarê Kurdî heme benê yew î. Wazena partîya qaşo muhafezekare bena, qaşo demokrate bena, qaşo adile bena yan zî qaşo çepgirotî bena (ke xo ra Tirkîye de estbîyayîşê çepgiroteyan mijara nîqaşe yo, muhafezekarî û demokratî û adilî zî heme qaşo de manenê. Pergale dîn zî, demokrasî û edalet zî rayîrê erkê dewlet û desthilatîya xo de xebetnenê) temam hemverê şarê Kurdî benê yew î. La dimayê dagirkerdişê Efrînî û nika zî ke bi nameyê Çimeyê Gunî (Bariş Pinarî) wazeno temamê Rocawanî dagir bikero û statuya ke şarê Kurdî visto xo dest destê înan ra veco ame famkerdişî ke tenê partîyê înan nê bi siyasetkaranê xo ra bigî heta qaşo hiqûqnasanê xo, bi fûtbolkaranê xo ra bigî heta qaşo hunermendanê xo, bi esnafanê xo ra bigî heta qaşo xoce û melayanê xo miletê înan di waştişê çinêkerdiş û qirkerdişê şarê Kurdî de beno yew.

La çi heyf ke ma hema zî bi biratîya înan xo xapênenê! Vero ke ma hewl bidê yewîtîya mîyanberê şarê xo awan bikerê ma xo bi biratîya vergan xapênenê û nê heta nika derbeyo tewr pîl dayo şarê ma ro. Ma tenê yewîtîya partî û miletê dagirkeran a hemverê şarê Kurdî rê nêbenê şahid eyn awayî ma benê şahid ke heme dewletê serdestî yê dinya zî destek danê na dewleta dagirker e û hemverê şarê Kurdî de benê yew î. Nê dewletî heme vînenê û benê şahid ke qirkerdişê senînî şarê Kurdî ser de yenê pêkardişî û ancî benê şahid ke rayvistişê terorî DAÎŞ hetê kam dewlete ra yeno destekkerdiş û fînanskerdişî, la semedo ke ma her partîyêke Kurdan anênê dinyayke ra û raştîya xo raşt vînenê, semedo ke ma benê sebeb ke yewîtîya neteweyî ya şarê Kurdî awan nêbo dewletê dinya zî ma cidî nêgînê û goreyê xo teşe danê welatê ma.

Heta ma nêbê yew î go welatê ma zî sey ma perçe perçe bimano û binê destê zaliman de binalo. Lazim o ma nê baş bizanê, heta ke ma yewîtîya xo ya neteweyî nêkerê awan go dewletê serdestî zî azadîya ma û welatê ma ser de kayanê xo bikerê dewre û go ma nêarê hîsabî.

Dimayê cayê kiştişê qatilê Kurdan o serçete Bexdadî ke rayêke bîne ame dîtişî ke kam rayvistişêke terorî yê sey DAÎŞ’î hewêneno, hebêneno û keno wey, la ancî zî dewletê dinya bêvengîya xo domnenê. Şarê Kurdî no şeş hewt serrî yo dewletanê dinya yê qaşo merdimparêz û heqparêzan ra vanê banîrê Heşe nanya etya la her hewe ey vanê rêçe heşe nanya etya.

Sey ke min va heta ma nêbê yew î dagirkerî zî dewletê serdest ê emperyalîst zî go ma û welatê ma ser de kayanê xo bidomnê. Ma zanê zehf rayan têkilîya na dewleta dagirker e bi teror DAÎŞ’î dir vecya raşte û bî eşkera, la binê hîmayeyê xo de hewênayîşê serçeteyê nê rêxistinê terorî çîyo ke dewletê serdest î yê dinya bêveng bimanê nîyo. Bêvengîya înan ancî bêtefaqîya ma ra ya. Heme dinya bêvengîya xo ya qirkerdişê Kurdan de bîya yew e la ma hema zî di jobînan de yê, konê jobînan wa û xo yewîtîya neteweyî ra dûrî danê. Hêvîya min na ya ke 2’yê Mijdare senîn ke rocê Kobane yê Dinya yo go şarê Kurdî û heme partîyanê Kurdan rê zî bibo rocê yewîtîya Kurdan ey dinya.

Dikarî Biecibînî