Erdê Kurdan de ziwanê Tirkan!

Kerdena hişmendîya faşîst heme cayê ke Kurdî tede cuyenî de eynî ya. Na hişmendî wazena ke Kurdî tu cayê dinya de wayîrê statu nêbî û nêresî heqanê xo. Hem hetê sîyasî hem zî hetê kulturî de dewlete nêverdena ke Kurdî aver şêrî. Bi hêrişanê xo ke vera Rojawanê Kurdistanî de kerdî de newe ra vejîya orte ke na pergala faşîst wazena erdanê Kurdan îşqal bikera û estbîyayîşê Kurdan çin bikera.

Kurdî bi kedêko pîl demokrasî ser o pergalêk awan kerdî. Bi beşdarîya şaranê bakurê Sûrîye na pergal aver şîye û vengê xo resna heme welatanê dinya. Bi perspektîfê netewa demokratîk na pergale ameye awankerdene û heme şaran ard pêser. Kurdî bi na pergala xo mîyanê heme Sûrîyeyijan sînerjîyêk awan kerdî. Naye hetê zaf hêzan ra ameye qebûlkerdene û seba qanûno bingeyî yê Sûrîye na pergale hem hetê Kurdan ra hem zî hetê hêzanê bînan ra ameye pêşnîyazkerdene. Labelê Dewleta Tirkî seba ke na pergala ke heme şaran gêna mîyanê xo û binê banê demokrasî de ana pêhet hedef girewt. Sere de waşt ke Efrîn bigîra, heme hêzê xo û heme çeteyê ke Sûrîye de estî, verê înan tada erdê Kurdan û uca îşqal kerd. Îşqalkerdişê Efrînî tena bi destê Tirkîye û çeteyan nêbi; eynî wextî de hêzê mîyanneteweyî zî no îşqal de ca girewtî û paştî dayî Tirkan. Dewleta Tirkî wexto ke kewt Efrînî, waşt ke heme Kurdan uca ra dûrî bifîna û Ereban uca de bica bikera. Efrîn bi destê leşkeranê Tirkan û çeteyan rijîya. Heme çîyê ke eîdê Kurdan bî Efrîn de raşîyayî. Ziwan û kulturê Kurdan, erdê Kurdan de çîn hesibyayî. Nimuneya en pîle zî nameyê sazîyanê bajarî yê; heme tabelayî bi Erebî û Tirkî aliqyayî.

Na polîtîka mojnena heme dinya ke estbîyayîşê dewlete, çînbîyayîşê Kurdan ser o yo û dişmentîya vera Kurdan seba înan esaso en pîl o. Bi na hişmendî dewlete verê xo tada bajaranê bînan ê Rojawanê Kurdistanî û waşt ke qirkerdişêko pîl biviraza. Labelê xoverdayîşê Kurdan vernîya hêrişanê dewlete girewt û Kurdî hem şer de hem zî hetê dîplomasî de waştî ke kerdenanê Dewleta Tirkî bimojnî heme dinya. Naye tay bo zî aşkera bîye labelê dewlete û çeteyê ke girêdayîyê aye yê hêrişanê xo nêedilnayî. Bi heme îmkananê xo waştî ke Girê Spî û Serêkanîyê bigîrî. Netîceyê hêrişanê xo yê xidarî de nê wirdî bajaran girewtî. Nê cayan de kerdena înan hêna sey kerdena Efrînî bîye. Bajarê ke Kurdî tede cuyenî de seke qet Kurdî çîn bê, muameleyî bîyê û hêna nameyê Kurdan her wirdî bajaran de ameyê qedexekerdene. Tabelayê Tirkî ameyê aliqnayene. Bi na kerdene ma vînenî ke dewlete ziwan û kulturê Kurdan çîn hesibnena. Nêwazena ke tu cayê dinya de ziwan û kulturê Kurdan bibo. Kerdenanê xo yê mîyanê sînoranê Tirkîye, resnena Rojawanê Kurdistanî û uca de zî wazena ke vernîya Kurdan bigîra. Labelê ma heme baş zanî ke nê kerdenanê dewlete nêeşkenî vernîya Kurdan bigîrî; do ziwan û kulturê Kurdan heme cayanê dinya de bicuyê.

Dikarî Biecibînî