Paltformêka weşike yê cinîyê kurdan

22’yê Kanûna 2019’ine de raya diyîne cinîyê Kurdan binê nameyê Platforma Cinîyê Kurdan a Yewgiroteyan şaristana Amede de ameyî têhet. Kombîyayîş bi şîare ‘Ma Îta Yê, Ma Îta Ra Yê, Yewîtîya Ma Azadîya Ma Ya’ virazya. Na platforme heme partî,  sazî û heme bawerîyan rê akerdîya û dana zanayîşî ke fikrê ma, îdeolojiya ma, bawerîya ma çi bena wa bibo peynîya peynî ma heme Kurd ê û armanca yewine yê awankerdişê na platforme wedartişê heme nakokî û dibendîyanê mîyanberê şarê Kurdî û awankerdişê yewbîyayîşê mîyanberê şarê Kurdî yo.

Herçiqas na platforme kêmasîya îmkanan ra nika de bi Bakûr sînordar menda zî wexta îmkanî bêrê viraştişî go her çar hetan ra cinî tede ca bigîrê. Kombîyayîşê diyîne yê na platforme de xebatê di serran ame erjnayîşî û cinîyanê ke platforme de ca girotêne vînayîş û pêşnîyazê xo ardî ziwan. Pêşnîyazê ke heme cagiroteyî fikrêke ser de bî meseleya ziwanî, tundiya cinî ser, muhîmîya yewîtî, azadî û têduştiye bi. Kombîyayîş de ame ziwan ke hemparîya ma Kurdbîyayîşê ma ya. Û ti îdeolojî, ti partî û ti bawerî vernîya Kurdbîyayîş ma de nîna. Beno ke îdeolojîya ma, bawerîya ma û fikrê ma yê bînî bibedelyê la bi ti awayî Kurdbîyayîşê ma û  nasnameyê ma nêbedelêno.

Beno ke fikir, îdeolojî û bawerîyê ma cîya cîyay bê la nasnameyê ma yew o û loma fikir, îdeolojî û bawerîya ma çi bena wa bibo lazim o ma nasnameyê xo ser yewîtîya xo virazê û bi yewîtî û pêgirotişiya xo semedê azadîya xo hemverê desthilatê dagirkeran û emperyalîstan têkoşîna hempare hêzdar bikerê. Kombîyayîş de ame ziwan ke heqê ti şexsêke yan zî ey partîyêke çinêyo ke semedê nehfanê xo yê şexsî kişta dagirker û desthilatan de ca bigîro û vatişê Cegerxwînî yo ‘Kurdêne bibê yew, eke şima nêbê yew şima go şorê yew bi yew’ hetê cinîyanê cagiroteyan ra ame ziwan. Bwerîya heme cagiroteyan na bî ke yewîtîya cinîyanê Kurdan go azadîya Kurdan û welatê înan bîyaro û ciwîyîno azad go bi destê cinîyan awan bibo. Bi raştî na Platforme hêvîyêka pîle dana merdimî ke go bi xebata xo roc bi roc yewîtîya şarê Kurdî nizdîrê bîyaro.

Bawerîya ma bi na platforme esta ke go bişeko nê wezifeyê pîrozî bido milê xo ser û nê armancê xo de bi ser biko. Senîn ke kultirê wextanê verî yê şarê Kurdî de cinîyanê Kurdan bi leçeke(mexmele) xo şerê mîyanberê di hetan, keyan û şerê mîyanberê eşîran vindarnayo eke dest bido xo go eyro zî heme dibendî û nakokîyanê mîyanberê Kurdan wedarno û yewîtîya neteweyî mîyanberê Kurdan de bido awankerdişî. Kombîyayîş de bale ro tundîya ke desthilatîya zayendpereste cinîyan ser de pêk ana zî amî antişî û cinîyê cagiroteyan ard ziwan ke lazim o hetê têkoşîna hemverê tundîya cinî ser de zî yewîtîya cinîyan awan bibo û pêdir bieşkê cinîyan xetereyê qirkerdişan ra bipawê û têduştîya cinî û mêrdî mîyanberê civake de bidê awankerdişî. Na platforma ke bi îmkananê xo yê kemîyan xebatêke baş e mîyanê nê di serran de da raşte bawerî dana ma ke go nizd ra bierso armanca xo.