YPJ’ê bîlançoya sala 2018’an aşkera kir

Navenda Nûçeyan

YPJ’ê bi daxuyaniyekê bîlançoya şer û pevçûnên sala 2018’an parve kir. Li gorî daxuyaniyê, di encama pevçûnên li Efrînê de 2 hezar 772 çete û leşkerên dewleta tirk hatine kuştin

Fermandariya Giştî ya Yekîneyên Parastina Jin (YPJ) bi daxuyaniyekê bîlançoya şer û pevçûnên sala 2018’an bi raya giştî re parve kir. Di daxuyaniyê de fermandariyê ragihand ku sala 2018’an ji bo wan bû saleke berxwedanê û hêzên wan derbên giran li çeteyên DAIŞ’ê, artêşa tirk û çeteyên wê dane.

Di daxuyaniyê de fermandariyê diyar kir ku şervanên parastinê yên jin, ji destpêka şoreşa Rojava ve di asta pêşengiyê de cihê xwe di nav şer û berxwedanê de girtine. YPJ’ê diyar kir ku wan weke YPJ’ê bi her awayî erka parastina tevahî jinan û gelê xwe bi cih aniye û daxuyand ku hêzên wan di Berxwedana Serdemê de bi vîneke ji polayê, wêrekî û baweriyek mezin bersiva êrîşên dewleta tirk dane û ev sekn û biryaradariya şervanên wan serkeftinê diyar dike.

Fermandariya giştî destnîşan kir ku şervanên wan bi awayekî çalak di Pêngava Bagera Cizîrê û hemû şerên li dijî DAIŞ û hêzên dagirker de girtine. Di berdewamê de jî fermandariyê bîlançoya salekê parve kir.

Bîlançoya şer

Bîlançoya şer û pevçûnên sala 2018’an wiha ye: “Li Efrînê di 58 rojan de 900 caran şer qewimîn û dijmin hezar û 42 êrîşên hewayî pêk anîn. Di şer de 2 hezar û 422 leşker û çeteyên dewleta tirk hatin kuştin. Di qonaxa duyemîn a Berxwedana Serdemê de hêzên me 147 çalakî pêk anîn û di çalakiyan de 350 çete û leşkerên dewleta tirk hatin kuştin. Di qonaxên cuda yên Pêngava Bagera Cizîrê de 4 hezar û 214 çeteyên DAIŞ’ê hatin kuştin. Di pêngavê de bi dehan navçe û bi sedan gund ji dagirkeriya DAIŞ’ê hatin rizgarkirin. Her wiha bi dehhezaran sivîl hatin rizgarkirin. Di şer û berxwedana rûmetê ya sala 2018’an de 149 şervanên me şehîd bûn.”

Dikarî Biecibînî