Buldan: Rewşa Guven di xeteriyê de ye

Hevseroka HDP’ê Pervîn Bûldan diyar kir ku yên fermana Komkujiya Parîsê dan, îro Ocalan tecrîd dikin. Bûldan destnîşan kir ku Leyla Guven ev 62 roj in li dijî tecrîdê di greva birçîbûnê de ye û got ku rewşa Guven di xeteriyê de ye

Hevseroka Partiya Demokratîk a Gelan (HDP) ê Pervîn Bûldan di civîna koma meclisê ya partiya xwe de, mijarên di rojevê de ne nirxandin.

Bûldan di destpêka axaftina xwe de sê jinên kurd ên di 9’ê Çileya 2013’an de li Parîsê hatin qetilkirin, bi bîr anîn û wiha got: “Gelo armanca kesên fermana Komkujiya Parîsê dan çi bû? Xwestin pêvajoya çareseriyê bi dawî bikin. Di 5’ê nîsana 2015’an de dest bi pêkanîna tecrîd û şer kirin. Kesên wê demê fermana komkujiyê dan, îro jî tecrîdê bi rê ve dibin. Di nav tecrîd û Komkujiya Parîsê de tu ferq tune ye û bi hev ve girêdayî ne.”

Di berdewamê de Bûldan bal kişand ser çalakiya greva birçîbûnê ya Leyla Guven û diyar kir ku çalakiya Guven ev 62 roj in li dijî tecrîdê didome û wiha pê de çû: “Girtîgeh bûye duyemîn adresa Leyla. Dema bavê xwe winda kir di girtîgehê de bû û niha dayika xwe jî winda kir dîsan di girtîgehê de ye. Weke ku tu agahiya wezaretê ji rewşa tenduristiya Guven tune be, xwest wê bi rîngê bibin şînê. Leyla Guven 14 kîlo daye. Tansiyona wê dikeve û dilê wê tim dixele. Bedena wê êdî avê jî qebûl nake. Êdî rewşa Leyla Guven di xeteriyê de ye. Leyla bi awayekî bêhiqûqî di girtîgehê de tê girtin lê ew ji bo pêşeroja welat û aştiyê têdikoşe û bi canê xwe li ber xwe dide.”

Her wiha Bûldan da zanîn divê destê Guven ku dirêj kiriye li hewa nemîne û destnîşan kir ku yên destpêkê dengê Guven bihîstin girtîgeh bûne û wiha dawî li axaftina xwe anî: “Niha nêzî 150 girtî di girtîgehan de di grevên birçîbûnê yên bêdem û bêdorveger de ne. Ev tecrîda reş û tarî yan dê rabe yan dê rabe.” AMED

Dikarî Biecibînî