YPG’ê fermandar Xebat Dêrik bi bîr anî

Navenda Nûçeyan

Di 8’emîn salvegera şehadeta fermandarê YPG’ê Xebat Dêrik de YPG’e daxuyaniyeke nivîskî weşand. Di daxuyaniyê de Dêrik hat bibîranîn û hat destnîşankirin ku li ser şopa wî, rojane xiyanet, teror û dagirkerî tê têkbirin

Navenda Ragihandin û Çapemeniyê ya Yekîneyên Parastina Gel (YPG) têkildarî 8’emîn salvegera şehadeta Xebat Dêrik daxuyaniyek nivîskî weşand. Di daxuyaniyê de YPG’ê diyar kir ku yekîneyên wan li ser bingeha ku Xebat Dêrik ji wan re daniye, xiyanet, teror û dagirkeriyê rojane têk dibin û serkeftinên mezin bi dest dixin.

Di daxuyaniyê de YPG’ê got ku di 8’emîn salvegera şehadeta damezirînerê YPG’ê şehîd Xebat Dêrik de, xencera xiyanetê ku hêviyên şoreşa azadiyê hedef kiriye lenet dikin û li hemberî xiyanet, teror û dagirkeriyê bê teredûd xwe birêxistin dikin û serkeftinan bi dest dixin. Di berdewamiyê de jî YPG’ê got ku weke fermandarî û hemû yekîneyên YPG’ê, di serî de Xebat Dêrik, li pey şopa hemû şehîdên şoreşê ku bê teredûd di xeta parastina rewa de pêşengtiyê ji wan re dikin, dê armancên şoreşê bi ser bixin û mezintir bikin.

YPG’ê daxuyand ku xiyanet, teror û dagirkerî bi hemû rêbazên ne exlaqî û kirêt êrîşî nirxên şoreşê ku bi lehengiya şehîdan û keda gelê şoreşger hatine bidestxistin dike û ev tişt hatin parvekirin: “Yekîneyên me li ser bingeha ku şehîd Xebat Dêrîk ji hêza me re daniye, xiyanet, teror û dagirkeriyê rojane têk dibin û serkeftinên mezin bi dest dixin. Mîrasa ku şehîd Xebat û hemû şehîdên azadiyê ji yekîneyên me û gelê şoreşger re hiştiye têrê dike ku bi hezaran nifşên civaka me li ser xeta parastina rewa xwe bi rêxistin bikin û pergala azadiyê bê dawî misoger bikin.”

Soza şopandina rêya şehîdan dan

Navenda Ragihandin û Çapemeniyê ya YPG’ê wiha dawî li daxuyaniya xwe anî: “Em Fermandariya Giştî û hemû hêza Yekîneyên Parastina Gel, di 8’emîn salvegera şehadeta sazûmankarê hêzên me fermandar Xebat Dêrîk de soza berdewamkirina di meşa şopa şehîdên şoreşê de dubare dikin û diyar dikin ku heta dawiyê em ê bibin misogeriya destkeftiyên şoreşê û azadiyê.”

Dikarî Biecibînî