Tuncel û Irmak dest bi greva birçîbûnê ya bêdem û bêdorveger dikin

Navenda Nûçeyan

Hevseroka DBP’ê Sebahat Tuncel û parlamentera HDP’ê ya berê Selma Irmak bi rêya parêzerên xwe peyamek şandin û diyar kirin ku ji bo rakirina tecrîda girankirî ya li ser Rêberê Gelê Kurd Abdullah Ocalan ji 15’ê çileyê ve dest bi greva birçîbûnê ya bêdem û bêdorveger dikin

Hevseroka Partiya Herêmên Demokratîk (DBP) Sebahat Tuncel û parlamentera Partiya Demokratîk a Gelan (HDP) ya berê Selma Irmak, bi nameyekê ragihandin ku ji bo piştgiriya çalakiya greva birçîbûnê ya bêdem û bêdorveger ku hevseroka KCD’ê û parlamentera HDP’ê ya Colemêrgê Leyla Guven ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin, dest bi greva birçîbûnê ya bêdem û bêdorveger dikin.

Sebahat Tuncel û Selma Irmak bi rêya parêzerên xwe têkildarî mijarê agahî dan. Peyama Tuncel û Irmak li ber deriyê Girtîgeha Kandirayê ji hêla parêzerê wan Bulent Aşa ve hate xwendin.

Peyam wiha ye:

“Çalakiya greva birçîbûnê ya bêdem û bêdorveger ku hevala me Leyla Guven daye destpêkirin, kete roja 68’an. Berxwedan bi tevlêbûna gelek girtiyên din û li hemû girtîgehan her ku diçe mezintir dibe. Daxwaza Leyla Guven, ne daxwazeke şexsî daxwazeke civakî ye. Daxwaza bi milyonan kurdan û bi milyonan kesên demokrasî, aştî û azadiyê dixwazin e. Hevdîtina ku nîvsaet birayê birêz Ocalan li Îmraliyê pêk anî girîng e. Lê ev nayê wateya ku polîtîkaya tecrîd û îzolasyonê bi dawî bûye. Ji bo ku polîtîkaya tecrîda girankirî û îzolekirinê bi dawî bibe, em jî ji 15’ê çileyê ve dest bi greva birçîbûnê ya bêdem û bêdorveger dikin.

Divê baş bê zanîn ku heta tecrîda girankirî bi dawî bibe, çalakiya me dê bi israr û bi biryardarî bidome.  Ji bo bicihanîna daxwazên çalakgerên greva birçîbûnê, em hemû hêzên demokrasiyê vedixwînin piştevaniyê û banga bilindkirina têkoşînê dikin.”

Dikarî Biecibînî