‘Guh bidin qêrîna Leyla Guven’

Înîsiyatiya Grevên Birçîbûnê ya Girtîgehan ji bo bal kişandina çalakiya Leyla Guven û girtiyên din, li Gebzeyê daxuyaniya çapemeniyê da û diyar kir ku divê her kes guh bide qêrîna Leyla Guven

Înîsiyatîfa Grevên Birçîbûnê ya Girtîgehan ji bo bal kişandina çalakiya greva birçîbûnê ya bêdem û bêdorveger a hevseroka KCD’ê Leyla Guven li dijî tecrîdê ev 69 roj in daye destpêkirin û li gelek girtîgehan bi heman armancê hatiye destpêkirin, li Gebzeyê daxuyaniya çapemeniyê da.

Di çalakiyê de parlamenterê HDP’ê yê Kocaeliyê Omer Gergerlîoglu axivî. Gergerlîoglu bal kişand ser çalakiya Guven û diyar kir ku Guven ne ji bo wekîltiyê, ji bo tecrîda li Îmraliyê rabe dengê xwe bilind dike û wiha got: “Heqê wê yê parlamenteriyê hate desteserkirin, ew ne li pey parlamenteriya xwe ye. Li pey daxwazeke birûmet û bişeref e, li pey jiyaneke bi aştî û biratiyê ye.”

Gergerlîoglu bi bîr xist ku greva Guven ket roja 69’an, ev ji bo mirovan sînorekî xetarnak e, her wiha diyar kir ku 236 girtî ketine greva birçîbûnê û wiha domand: “Dengê berxwedana bi rûmet a Leyla Guven bibihîzin, ew ber bi mirinê ve diçe û heke tecrîd ranebe şertên li Îmraliyê baş nebin, Guven û 236 girtiyên li zindanan dê jiyana xwe ji dest bidin.”

Tecrîd sûcê mirovahiyê ye

Li ser navê înîsiyatîfê jî Yasemîn Uçer axivî û da zanîn ku pergala tecrîda teqez a li Îmraliyê ku li ser Rêberê Gelê Kurd Abdullah Ocalan hatiye ferzkirin, li cîhanê mînaka wê tune ye û ev yek sûcekî mezin e.

Di axaftina xwe de Uçer têkildarî çalakiya Guven destnîşan kir ku êdî ketine rojên wiha ku vegera wê zehmet e û bang li rêxistinên demokratîk kir ku guh bidin qêrîna Leyla Guven.

Her wiha Uçer herî dawî diyar kir ku bi berxwedana zindanan û derve dê dawî li tecrîdê were. STENBOL