Rojnameger Ziya Ataman nehat berdan

Rûniştina doza rojnameger Ziya Ataman hat dîtin. Ataman ligel ku îfadeyên kesê şahid qebûl nekirin jî, nehat berdan

Pêncemîn rûniştina doza nûçegîhanê Ajansa Nûçeyan a Dîcle (DÎHA) a bi KHK’ê hat girtin Ziya Ataman Ziya Ataman ku 33 meh in girtî ye, li yekemîn dadgeha cezayên giran a Şirnexê hat dîtin. Ji ber ku nebirin dadgehê Ataman li Girtîgeha Tîpa M a Wanê bi SEGBÎS’ê beşdarî danişîna xwe bû. Ataman bi kurdî parastina xwe kir û angaştên derbarê xwe de red kir. Her wiha Ataman ji bo parastinek berfireh bike, fotokopiya deftera nişeyan a di dosyayê de cih digire xwest.

Parêzerê Atamam Bariş Oflas jî diyar kir ku muwekîlê wî rojnameger e û wiha axivî: “Delîlên di dosyayê de hatine bicihkirin ne di wesfê delîlan dene. Ez daxwaz dikim ku muwekîlê min bê berdan.”

‘Ji ber failan nedîtin em kirin fail’

Her wiha di heman dosyayê de bi Ataman re 9 kesên din jî ku niha girtî ne, hat darezandin. Ji van girtiyan girtiyê bi navê Hikmet Ataman bal kişand ser pêvajoya girtina xwe û diyar kir ku di dosyaya dozê de tu delîlên şênber tune ne û wiha got: “Li navçeyê ji ber ku failê hin bûyeran nehatin dîtin, em kirin fail. Kesên weke şahid di dosyayê de cih digirin jî di bin îşkenceyê de îfade dane.”

Çalakiya Guven silav kirin

Girtiyên din jî bal kişandin ser dirêjbûna pêvajoya girtina xwe û xwestin bên berdan. Girtiyekê çalakiya greva birçîbûnê ya Hevseroka KCD’ê Leyla Guven a 71 rojin li dijî tecrîda li ser Rêberê Gelê Kurd Abdullah Ocalan didome, silav kir.

Şahid îfadeyên dabûn qebûl nekir

Kadir Ataman ê berê derbarê hin girtiyan de îfade dabûn û ji dosyayek din girtiye jî da zanîn ku ew îfadeyan qebûl nake û wiha got: “Di dema pêvajoya binçavkirinê de ev îfade hatibûn amadekirin û di bin îşkenceyê  de bi min dan îmzekirin. Girêdana girtiyan bi rêxistinê re heye yan tune ye nizanim. Ez îfadeyên bi min hatine îmzekirin qebûl nakim.”

Şandeya dadgehê piştî navberê biryara berdewama girtina girtiyan da û danişîn taloqî 26’ê adarê kir. ŞIRNEX

 

Dikarî Biecibînî