‘Hevdîtin nayê wateye rabûna tecrîdê’

Buroya Hiqûqê ya Asrinê têkildarî hevdîtina bi Ocalan re daxuyaniyeke nivîskî weşand. Buroya hiqûqê diyar kir ku li Îmraliyê tecrîdeke giran heye, têkiliya Ocalan bi hemû cîhanê re hatiye qutkirin û destnîşan kir ku ev hevdîtin nayê wê wateyê ku şertên tecrîdê hatine guhertin û tecrîd ji holê rabûye

Birayê Rêberê PKK’ê Abdullah Ocalan, Mehmet Ocalan di 12’yê çileyê de çû girava Îmraliyê û hevdîtin pêk anî. Buroya Hiqûqê ya Asrinê têkildarî hevdîtinê daxuyaniyek nivîskî weşand.

Di daxuyaniyê de hat diyarkirin ku hevdîtina Mehmet Ocalan di şertên li dijî rewşa asayî de û derveyî prosedûran pêk hatiye û ev tişt hat gotin: “Birêz Ocalan ji 27’ê tîrmeha 2011’an vir ve nikare bi parêzerên xwe re hevdîtinê pêk bîne. Heta niha 781 serlêdanên me yên ji bo hevdîtinê hatine redkirin. Ji adara 2015’an vir ve bi tu awayî bi 3 muwekîlên me yên din ku neqlî Îmraliyê hatibûn kirin hevdîtin nehatiye kirin.  Serlêdanên me yên ji bo li gel birêz Ocalan heta 15’ê tîrmeha 2016’an bi hincetên ‘keştî xerabe ye’ û ‘muxalefeta hewayê’ dihatin redkirin. Piştî îlankirina OHAL’ê ya di 20’ê tîrmeha 2016’an vir ve bi biryara dadgehê hevdîtinên me hatin redkirin. Ji bilî hevdîtinê tu amûrek ragihandinê jî nayê qebûlkirin û hemû hatine astengkirin. Ev rewş tê wateya ‘Tecrîda girankirî.’”

Saziyên berpirsyar bêdeng in

Di berdewamê de hat ragihandin ku Îmrali qadeke li dijî hiqûqê ye û hat destnîşankirin ku li dijî vê bêhiqûqî û tecrîdê saziyên berpirsyar ên navneteweyî jî bêdeng dimînin û ev tişt hat parvekirin: “Bertekek têr nîşan nadin. Di serî de DMME û CPT ji vê yekê berpirs in. Ev pêkanîn gihîştine asta îşkenceyê. Derheqê van pêkanînan de biryar nayê dayîn û ya jî biryarên tên dayîn bi awayekî têr nayên şopandin. Ev rewş jî piştevaniyê dide ku tecrîda girankirî bê kûrkirin.”

Hevdîtin têkildarî tenduristiyê pêk hatiye

Di daxuyaniyê de Buroya Hiqûqê ya Asrinê bal kişand ser hevdîtina Mehmet Ocalan û destnîşan kir ku hevdîtin têkildarî mafê jiyan û tendûristiyê pêk hatiye û wiha pê de çû: “Ev hevdîtin jî nayê wê wateyê şertên tecrîda girankirî hatine guhertin û ji holê rabûye. Berevajiyê vê yekê tam 28 meh şûn de hevdîtin li gel birêz Ocalan pêk hatiye. Her hevdîtinek li gel birêz Ocalan pêk tê pêşketinek e û biçûk bê dîtin û xwedî girîngiyekê ye.  Bendewariya civakê û raya giştî jî vê cidîbûnê daniye holê. Wateya hebûna birêz Ocalan a ji bo civakê carek din jî xwe da nîşandan. Ji ber rewşa kêfî û pêkanînên dijhiqûqî nayê xuyakirin ku dê carek din kengî hevdîtin pêk were. Me wek parêzerên birêz Ocalan di 16’ê çileyê de serî li dozgeriyê da ku biçin hevdîtinê bikin, lê carek din serlêdana me hat redkirin.” STENBOL

Dikarî Biecibînî