HDP’ê îtîrazî bi hezaran hilbijêrên sexte kir

Navenda Nûçeyan

HDP’ê li Mûş, Îdir, Qers û Bedlîsê li dijî bi hezaran hilbijêrên xeyalî îtîrazî YSK’ê kir

Piştî lîsteyên hilbijêran hatin daliqandin hîlebaziya qeydên hilbêjêran jî derketin holê. Ev hîleyên qeydên hilbijartinan didomin. Partiya Demokratîk a Gelan (HDP), bicihkirina 119 hilbijêran li avahiyek Qersê, li Îdirê li ser du daîreyan 774 polîs û leşker, li Mûş û navçeyên wê 5 hezar û 279 hilbijêr, li Bedlîsê û navçeyên wê nêzî 2 hezaran hilbijêr hatin qeydkirin û zêde bûne, îtîrazî Desteya Bilind a Hilbijartinê (YSK) kir.

Li gorî lêkolînên HDP’ê li gelek tax û gundên Mûş û navçeyên wê 5 hezar û 279 hilbijêr qeyda wan bi awayekî sexte hatine çêkirin û zêdekirin.

Hevserokê HDP’a Mûşê Ferhat Çaki têkildarî hilbijêrên sexte diyar kir ku heta niha wan li dijî 5 hezar 279 hilbijêr îtîrazî YSK’ê kirin e û wiha got: “Ev jî nîşan dide ku zextên tifaqa faşîst a AKP û MHP’ê li dijî hilbijêrên HDP’ê zêde bûne. Tevî van hemû hîle û sextekariya wan jî em ê wan di sindoqan bifetisînin.”

Li Îdirê jî li gorî lêkolînên rêveberên HDP’ê, 774 polîs û leşker li ser du daîreyan hatine qeydkirin. HDP’iyan got ku ev hilbijêr di hilbijartina 24’ê hezîranê de li deverên din dengê xwe bikar anîne û li dijî van hilbijêran serî li YSK’ê da.

Rêxistina HDP’ê ya Qersê derxist holê ku li navenda Qersê li ser daîreyeke vala 119 hilbijêr hatine qeydkirin û HDP’ê li dijî van qeydan jî îtîrazî YSK’ê kir.

Her wiha yek ji bajarên herî zêde jî hilbijêrên zêde lê hatin qeydkirin Bedlîs û navçeyên wê ne. HDP’a Bedlîsê diyar kir ku li navenda Bedlîs û navçeyên wê nêzî 2 hezar hilbijêrên zêde hatine qeydkirin û li dijî vê yekê serî li YSK’ê dane.

Dikarî Biecibînî