Ocalan qalê Îmraliyî keno-V

“Ez, bi şer yan zî bi haştîye, zor dana ci ke problemê Kurdan rê netîceyê çareserîye yo nihaiyî bigîra. Polîtîkaya înan a seba Kurdan “ne bimire ne zî bimane” ya. ”

Rayberê Şarê Kurdî Abdullah Ocalan, sîstemê îmralîyî zî sey yew parçeyê Komploya Mîyanneteweyî vîneno. Uca yî sirf yew hepisxaneyê girawe nêvîneno, sey yew mekano winasî yo ke modernîteya kapîtalîste, bi hêrişêko pîl, şexsê ey de pêroyê şarê herême xo rê kerdê hedef vîneno û wina nirxneno.

Kitabê Ocalanî yê bi nameyê ‘PAWITIŞÊ MHMEyî – DEWLETA SUMERE YA RAHÎBAN RA VER BI KOMARA ŞARÎ’ de prosesê komploye û rastîya Îmraliyî her het ra çiman ver fîneno ra. Ma qismê pancine pare kenê:

Sîyasetê Yunanî komplo de taşeron o

Yeno asayene ke komplo xêza pêkewtişê Rojhelat-Rojawanî ser ameya viraştene. Ez sey nuqteya ke Anatolî, Tirkîya kena zihîf hîsab kerda. Yunanîstan o ke domanê Rojawanî yo tebera yo, tim waşto ke mi tena sey kesê pozîsyonê zerardayoxîye de bivîno. Eksê ci, wexto ke fehm kerd têkilîya mi zerar dana ey, qet xo peyde nêgirewt û ez eşta bi zereyê adirî. Labelê komploya peyêne de rolê xo yo esasî sey yew hemkarê xayînî yo. Bi xo plan û tetbîq nêkerdo, zîyaderî sey taşeronî mendo. Bi na taşeronîya xo waşto ke demê ameyoxî de hem Qibris, hem zî Ege de wayîrê rolî bo û tawîz bigîro. Qewimîyayîşanê peyênan musnayo ke nê xusûsî de fikrê xo wina bîyo.

Hetê peyî de rastgirê Îsraîlî estê

Temsîlkaro taybet Blîndkenî beyanatê çapemenîye de vatbî, Clîntonî bi xo ez teslîm kerda. Nê sey tewirê ver a terorîzmî îzah kerdêne raste nîya. Îsraîl hemsencîya Rojhilatêmîyanênî ya stratejîke de, seba ke Tirkîya xo het de pê bigîro na komploye viraşte la Îsraîl no derheq de tena nîyo. O wext Serekwezîrê Îsraîlî Benyamîn Netanyahu bi û o bi xo blokê lîkudî yê rastgirî de bî.

Bingehê koordînasyonî Londra de ame eştene

Wexto ke amadekarîya komploye amîbî viraştene, Clînton bi şantajê Monîca bêtesîr verdaybî û Clîntonî nêeşkayêne bivecîyo teberê qesaya lobî ya Îsraîlî. Bingehê koordînasyonê komplo Londra de ameybî eştene. Waştenê mi îzole bikerê û PKK û Kurdan bigîrê binê kontrolê xo. Hesab no bî. Ewropa no sebeb ra, tasfîyebîyayîşê mi goreyê karê xo dî. Çunku ez, polîtîkaya înan a Kurdan ver sey astengî bîya.

Îcabê psîkolojîk û kulturîyî

Seba ke kulturê rojawanî ez xo mîyan de nêhelnayo, waşt ke mi teber de biverdo. Her çiqas ke karo eknomîk o maddî çiman ver de biaso zî, hetê kulturî ra zî ganî merdim baş bivîno. Qaşo hewayê Rojawanî yo ke nêwazeno sey Lenîn û Humeynî, kesê neweyî bivejîyê, no derheq de tesîr kerd. Bi ney vejîya meydan ke, ê nêwazenê hemkarê kulturî û teqlîtkaran ra dot kes bimano. Ê wazenê ke Rojhilat ra her kes ganî xo nizm bikero û înan berz bivîno. Mi xo dî ke ez teberê mantalîteya înan de ya. No atmosfer bi zanayene ameyo awankerdene.

Vera çareserîya nîahîye yê

Kapîtalîzmê Ewropa derheqê polîtîkaya Kurdan de girêdayîya di sey serranê peyênan menda. Bingehê na polîtîka de, Tirk, Îran û Erebî girêdayîyê xo dîyê û Kurdî zî vera înan sey tehdîd kerdê ca. Ez wazena ke problemê Kurdan çareser bika û no derheq de zor dana ci. La ê nê problemî sey koz xo dest de gênê.

Wazenê heta ke Îran, Iraq û Tirkîya goreyê hesabanê xo dîzayn kerdî, Kurdan sey koz xo dest de bigîrê û no pozîsyon eşkera asayêne. Senî ke Tirkîya de zî tayê hetî nêwazenê no problem biqedîyo û goreyê karê xo ney problemî bişixulno. Polîtîkaya înan a seba Kurdan “ne bimire ne zî bimane” ya. Nêzdîbîyayîşê înan wina yo, “qaso ke nêmiro wayîr bivejîye, qaso ke nêcuwîyo tirrî de pê bigê” yo û no qeydeyêko wehşî yo. Tayê desteg ke bidêne, seba ke no problem biqedîyo şertê muhîmî vejîyayenê meydan.

Sey nimune, ewro nêzdîbîyayîşo ke seba Kosova û Makedonya musnenê, bi israr bimusnenê Kurdan, nika no problem mabên ra darîyêne we.

Afernayîşê grûbanê hetgêranê Almanî

Teslîmkerdişê mi de, tasfîyekerdişê Hereketê Azadîya Kurdan û Rayberîya ey amacêko eşkera yo. Têkilîyê ke hemkarê Kurdan de ameyê ronayene, waşto ke bi ney tasfîkerdişî newe ra bibê rojane. Bi no qeyde, qaşo Rayberîyêka lîberal-demokratîke do bêro ronayene, her dewlete goreyê xo rêxistinan do biaferno. Almanya no derheq de sere ancena. Grûbê Tirk, Kurd, Ereb û Îranî yê ke hetê Almanya de yê afernayîş, polîtîkayanê Rojhelatêmîyanênî yê kanî yê û Enver Paşayî ra nat yene domnayene.Kurdê Iraqî no derheq de xeylê avêr şîyê û no demo peyên de Tirkîya de zî nê gamî yenê eştene.

Tasfîye nêbîyayîşê Hereketê Azadîya Kurdan ra dima ê wazenê ke newe ra parçe bikerê, eke nêbo zî, ê do bibê vila û şorê. Heto bîn ra wazenê şert û mercê haştîye yê ke vejîyê meydan îstîsmar bikerê. Hereketê Azadîye ke komelê sivîlî pêt nêkero, ê do hîna zêde îstîsmar bikerê. Tîya de çîyo muhîm o yo ke ganî verê rêxistinanê kanperestan û hemkaranê sextekaran bêro girewtene û no derheq de şar bêro heşarkerdene.

Derheqê haştîye de netîceyê hesabanê xeletan

Derheqê haştîye de cigêrayîş kerdene, qetîya wextê xo tal û bêtal derbaz kerdene nîyo. Kesê ke rayîrê haştîye ya şerê xo a nêkerê, her çiqas ke hetê leşkerîye ra qezenc bikerê zî, peynîya peyêne de kenê vîndî. Rayberê ke vera şar û leşkeranê xo berpirsîyar ê ganî problemanê haştîye zî qasê problemanê şerî pêt çareser bikerê. Rayberê ke wina hereket mekerê, peynîye de kenê vîndî.

Şero newe do sey şerê verî nêbo

Serkewte bo yan zî nêbo, no proses muhîm o. Nê ra dima yew şer ke bibo zî sey ê verî nêbeno. No qrîzo ke Tirkîya tede ya, netîceyê şerê verî yo. Na rastîye ke baş nêro dîyayene û îtîraf kerdene, bi haştîye nêro çareserkerdene, mabên ra we nêdarîno. Çunke nêwazenê sebebê ci rast teşhîs bikerê. O wext tedawîya ci zî do baş nêro kerdene. Tirkîya serranê 2000î de zereyê nê nakokîyî de ya. Krîz yan bi şerêko hîna gonin yan zî bi haştîyêka adilane û raste mabên ra darîno we.

Prosesê Îmraliyî newe ra bîyayîşo hîrêyin i

Prosesê Îmralî seba Kurdan û seba mi demo hîrêyin ê newe ra bîyayîşî yo. Demo verên, komeleyê zîretî yê dewe yo ke seserra 20an de nêno were, ê demî de maya xora bîyayîş ra heta derbazê modelê komelê fermî bîyayîşî tarîf keno. No dem 15 hezar serran mîyan de, mabênê bêmana û kêmfikirî de derbaz bî. Verê û peyê 15 hezar serran de têkilîya cuye nêameya çareserkerdene.

Na bêçareserîye, mabênê keye û dewe de bîye sebebê şerê sosyalî. Ez yew îsyankaro dewij bîya. Nê îsyanî heta komeleyê fermîyî dewam kerd. Peyê cû, dewro diyîn ame. Destpêkerdişê dibistane ra heta vera komara Olîgarşîke serewedartiş, demê diyînî tarîf keno. No dem demêko winasî bi ke seke Don Kîşot hêrişê arêyeyê vayî keno, wina bî û problemî bîyî zêde û her ke şiyî bîyî pêt. Nakokîyê kapîtalîstî zî ameyî nakokîyanê neolîtîk û feodalan ser û bar bî giran. Seba ke uslûbê şorişgêrîye çin bî alozîye bîye vila. Nê îsyanî 20 serrî dewam kerd, dinyaye û herême de tesîrêko pîl da viraştene û netîceyê astengîyan de çerexîya bi prosesê Îmraliyî.

Prosesê Îmralî seba tena yew kesî nê, seba komar û şarî maneyê newe ra bîyayîşê hîrêyin o. Bîyayîşê diyînan bi şer û şidet, pakbîyayîşî temsîl keno. Bênakokî averşîyayîş nêbeno û mabênê nakokîyan de kudîyayene zî averşîyayîşî ra dot, ancax texrîbat, rijnayîş û krîzî keno pêt. Tirkîya, seba ke nakokîyê xo baş fam nêkerdê û seba ke wext de çareser nêkerdê kewta krîz û nêeşkena ci ra bivecîyo.

Îrade û hişmendîya têgêrayîşê azadîye

Proses seba pêroyê hêzan newe ra bîyayîş û formê neweyî zor keno. Dewlete ra heta ekonomîye, sîyasetî ra heta hiqûqî, exlaqî ra heta hunerî her çî hejîno û nê krîzî ver çareserîye rê gêreno. Prosesê min ê Îmraliyî zî yeno maneyê na rastîye.

Seke proseso verên yeno manaya “ez û şerî” û manaya winasî virazîyaya, proseso newe zî yeno maneyê “ez û haştîye”. Îrade û hişmendîya Azadîya Kurdan, mane û bingehê bîyayena min a. Hişmendîya min a ke bi cerebnayîşê şerî dewam kerdo, ewro derbazê prosesê haştîye bîya.

Prosesê şerî yo ke xo bi komara antî-feodale û antî-olîgarşîke formule kerdbî, ewro bi formulê prosesê haştîye û Komara laîke xo kerdo newe. No formul, cîyabîyayîş û şidetî red keno. Sîyaset û hiqûqê haştîye keno ke Kurdî estbîyayîşanê xo yê kulturîyan sey şarê azadî goreyê waştena xo bîyarê ca û komare de bibê yew. Komara ke Kurdan teber de vînena olîgarşîk a û şidet û cîyayîye peyda kena.

Yan haştîye yena yan zî şidet hîna beno pêt

Yewîya azade, yanê wereameyîşo demokratîk yeno manaya pîya ciwîyayîşî. No ke nêbo, sebebê xo o yo ke hîna mabênê komara olîgarşîke û komara demokratîke de mucadele nêresto netîce. Merdim ke nê hetî ra biewno ci prosesê Îmralîyî merhaleyê tarîxîyî nîşan dano. No proses yan haştîye ano, yan zî eke polîtîkayê înkar û îmha yê komara olîgarşîke ke bi no qeyde dewam bikerê, peynîya xo cîyayî û pêtbîyayîşê şidetî ya.

Ewro bingehê nê krîzo xorîn o ke tarîxê Tirkîya de nêameyo dîyayene de na rastîye ca gêna. Sîyaset meydanê çareserîye yo û Meclîs û Hikumat ke dest nêerzo ci, bi rastî û wext de ke game meerzo, sereyê problemî ke binimno û terkê bêçareserîye ke bikero, o wext ma zanê ke çimeyê problemî sîyaset o. Sîyaset îdamê mi sey şimşêrê Demoklesî hejneno û bi no qeyde çareserîye ra qal keno. Xeletîya tewr pîle bi xo na ya. No krîzê Tirkîya hîna keno pêt û zere û teber de dano destê çeteyanê rantkaran, hetê ekonomîyî ra her menge bi mîlyaran dolaran kena vîndî û welatî ver bi alozîye beno.

Şerê mabênê 15 serran de qalê merdena 40 hezar kesî kenê û bi seyan milyar dolar zerar ra qal kenê. O wext ganî no problem hetê tarîxî, bi şertê komelkî û mîyanneteweyî bêro namekerdene û çareserkerdene. Eke wina nêro kerdene, krîz do her ke şoro bibo pêt.

Demê şerî yo ke peynîya xo nêasena

Ez sey kes û sazîya rayberîye, prosesê Îmraliyî de, na çarçewa de probleman nirxnena. Bi zîhnîyetê faydeperwer û erjanan no nêno ca. Ha hetê dewletanê fermîyan ra ha hetê hemkaranê Kurdan ra bo, nêzdîbîyayîşê bi îftîra û înkarkerdişî wazenê demê şerî yo ke peynîya xo kor a do dest pê bikero.

Seke meşte do şer dest pê bikero

Seba ke no kay nêbo serkewte, ganî hîsgêr û bifehm bêro têgêrayene. Îmralî de çinkerdişê min o madî yan zî manewî, îradeya Tirk û Kurdan a azade rê yena manaya derbe. Seba naye zî ganî pêroyê amadekarîyê taktîk û stratejîk ê şerê pawitişî yê meşruyî bêrê dîyayene. Seba serkewtişê nê prosesî no esas o. Manaya Îmraliyî ya tarîxîye seba dewlete, şarî, komel, PKK û seba mi na ya.

Berpirsîyarîya sazîyanê Amerîka û Ewropa

Yew manaya 15ê Gucige ya ke ganî hetê YE, Amerîka û vera Peymannameya Heqanê Merdiman a Ewropa (PHME)  ra baş bêro famkerdene zî esta. No tewqîfkerdişo ke teberê hiqûqê PHME yî ameyo kerdene, Komara Tirkîya ra zîyadêrî, hem hetê hiqûqî hem hetê sîyasîyî ra sazîyanê Amerîka û YE keno berpirsîyar. Çunke senî ke mi pawitişê xo de zî kerdo eşkera, na rewşe bi hinciqnayîşê PHME yî ameya meydan. Amerîka û YE, şexsê mi de, hemverê îradeyê azadîya şarê Kurdî, sucêko bêexlaq û bêhiqûqî kerdo û no ganî muhakemekerdişî de nêro vîrrakerdene. BEDÎNAN – ANF 

Do dewam bikero….