Li Şeddadê teqîn: 3 kes birîndar bûn

Komeke çete îro di danê sibehê de li Şeddadê êrîşî bendeke kontrolê ya Hêzên Ewlehiya Hundirîn kir. Di encama êrîşê de 2 endamên hêzên ewlehiyê û leşkerekî amerîkî birîndar bûn.

Li cem Pira 47’an a li gundewarên navçeya Şeddad a Hesekê, di danê sibehê de li dijî benda kontrolê ya Hêzên Ewlehiya Hundirîn erîşeke xwekuj pêk hat. Di encama êrîşê de 2 endamên Hêzên Ewlehiya Hundirîn û leşkerekî amerîkî birîndar bûn.

Li gorî nûçeya ANHA’yê, di danê sibehê de li cem Pira 47’an a Şeddadê teqînek pêk hat. Di nûçeyê de hat destnîşankirin ku beriya ku êrîş pêk bê, wesayîta bombebarkirî ji hêla hêzên ewlehiyê û leşkerên amerikî ve hatiye ferqkirin.

Wesayît kirin mertal

Hat ragihandin ku dema ku hêzên ewlehiyê hewl didan pêşî li êrîşê bigirin, wesayît hate teqandin. Di encama teqînê de 2 endamên Hêzên Ewlehiya Hundirîn ku yek jê jin e û leşkerekî amerîkî birîndar bûn. Hat ragihandin ku dema hêzên ewlehiyê bi êrîşkar hesiyan, wesayîteke zirxî weke mertal bikaranî û di encama teqînê de wesayîta zirxî jî rûxiya. HESEKÊ