Polîs tehemûl nakin ku gel Guven pêşwazî bike

Piştî ku biryara berdana Leyla Guven hat dayîn, parlamenterên HDP’ê û gelê Amedê xwestin ku Guven li ber deriyê girtîgehê pêşwazî bikin. Lê polîsên ku girtîgeh dorpêç kirin nehiştin ku parlamenter bikevin hundir û gel nêzî girtîgehê bibe

Danişîna 5’amîn a doza hevseroka KCD’ê û parlamentera HDP’ê ya Colemêrgê Leyla Guven ku ji bo rakirina tecrîda girankirî ya li ser Rêberê Gelê Kurd Abdullah Ocalan 79 roj in di greva birçîbûnê ya bêdem û bêdorveger de ye, li 9’emîn Dadgeha Cezayên Giran a Amedê hate dîtin. Di danişîna ku tu kes tê de amade nebû, heyeta dadgehê biryara berdanê da. Li ser biryara dadgehê, polîsan derdora girtîgehê girt û nahêlin ku tu kes nêzî girtîgehê bibe.

Li gorî agahiyan, polîsan pêşî li kesên ku dixwazin biçin pêşiya Leyla Guven girtin û ji bilî keça Guven, Sabîha Temîzkan, nahêlin tu kes nêzî girtîgehê bibe. Têkildarî mijarê Temîzkan li ser hesaba xwe ya twîtterê peyamek parve kir û wiha got: “Ez li ber girtîgehê me. Tenê destûrê didin min û xizmên girtiyan ên ji bo hevdîtinê hatine. Dor li girtîgehê hatiye girtin. Destûr nadin ku wekîlên HDP’ê jî dayika min pêşwazî bikin. Ez ê bi tenê dayika xwe pêşwazî bikim.”

Destûr nedan rojnamegeran jî

Ji bo pêşwazîkirina Leyla Guven, hevserokên giştî yên HDP’ê Pervîn Buldan, hevserokê KCD’ê Berdan Ozturk û parlamenterên HDP’yî jî hatin ber girtîgehê. Lê destûr nayê dayîn ku parlamenter bikevin hundir. Di heman demê de polîsan destûr nedan ku rojnameger jî ji nêz ve dîmenan bikişînin. AMED

Dikarî Biecibînî