Efrîniyan nameyek da Navenda Lihevanînê ya Rûsyayê

Şêniyên Efrînê nameyek radestî Navenda Lihevanînê ya Rûsyayê ya li kantona Şehbayê kir û bang kir ku dewleta tirk a dagirker û çeteyên wê ji Efrînê werin derxistin

Bi sedan şêniyên Efrînê yên li Kampa Berxwedan a navçeya Fafînê kom bûn û berê xwe da Navenda Polîsên Leşkerî yên Rûsyayê yên girêdayî Navenda Lihevanînê ya Rûsyayê. Şêniyan li wir nameyek radestî navendê kir.

Şêniyan dirûşmên silavkirina Berxwedana Serdemê û banga yekitiya gelê Sûriyeyê berz kirin. Her wiha pankartên “Bi ruhê Berxwedana Serdemê em ê Efrînê rizgar bikin û dagirkeran tune bikin”, wêneyên şehîdên Berxwedana Serdemê û wêneyên komkujiyên ku ji aliyê artêşa tirk a dagirker ve li Efrînê hatin kirin, hildan. Şêniyan berê xwe da nuqteya çavdêriyê ya Rûsyayê ya li Şehbayê.

Paşê şandeyek ji Rêveberiya Xweser a Demokratîk berê xwe da nuqteya leşkerî ya Rûsyayê. Şênî ji aliyê berpirsê nuqteya çavdêriyê ya Rûsyayê li Bakurê Sûriyê Îvalanka ve hatin pêşwazîkirin.

Şandeya Rêveberiya Xweser bi navê gelê Efrînê got divê artêşa tirk a dagirker û çeteyên wê ji Efrînê werin derxistin, ji ber ku herêmên bakurê rojava di bin serweriya Rûsyayê de ne û dikare gel ji şer biparêze. Şandeyê diyar kir ku hemû giraniyê bidin rizgarkirina Efrînê û pêdiviyên ji bo vegera şêniyên Efrînê peyda bikin û tevahî herêmên Sûriyeyê ji terorîstan rizgar bike. Ji ber ku Sûriye xaka gelê Sûriyeyê ye û ne ya tu kesên din e.

Berpirsê Navenda Lihevanînê ya Rûsyayê li bakurê Sûriyeyê Îvalanka soz da ku ew ê nameya gelê Efrînê bigihînin fermandariya Rûsyayê. ŞEHBA