Ji bo Yildirim 18 sal cezayê hepsê hat xwestin

Dadgeha Cezayên Giran a Mêrdînê ji parlamentera HDP’ê ya berê Gulser Yildirim re 18 sal û 3 meh cezayê girtîgehê xwest

Danişîna 10’emîn a doza parlamentera Partiya Demokratîk a Gelan (HDP) ya Mêrdînê ya berê Gulser Yildirim ku bi hinceta axaftinên wê yên berê tê darizandin, li Dadgeha Cezayê Giran a Mêrdînê hat dîtin. Yildirim ji ber ku beşdariya bi rêya dîmen (SEGBÎS) red kir, beşdarî danişînê nebû.

Di danişînê de parêzerên Yildirim amade bûn û danişîn bi tespîta nasnameyê dest pê kir. Dozger der barê dozê de mutala xwe aşkera kir û ji ber 7 fezlekeyan bi îdiaya ‘Propagandaya rêxistinê ya li pey hev kiriye’ û ‘Gel tahrîkî dijminî û kînê kiriye’ xwest ku Yildirim bê cezakirin. Dozger di sûcdariya ‘Pesindayîna sûc û sûcdar’ de Yildirim beraat kir. Dozger bi giştî 18 sal û 3 meh cezayê girtîgehê ji Yildirim re xwest.

Piştî mutalaya parêzerê Yildirim, Erdal Kuzu parastina miwekîla xwe kir û wiha got: “Heke vê axaftinê ne siyasetmederek ji HDP’ê bikira û ku siyasetmedereke AKP’yî bikira dê we ev cezaye nedaba û dê nehata darizandin. Cudakarî li vir tê kirin. Nebin dadgerên dewlet û desthilatdariyê, bibin dadgerên gel. Em dixwazin miwekîla me bê berdan û beraetkirin.”

Heyeta dadgehê jî xwest Yildirim di danişîneke din de li salona danişînê amade be û doz taloqî 4’ê adarê kir. MÊRDÎN