Kiliçaslan ê CHP’yî hilbijartin û grevên birçîbûnê nirxandin

Endamê PM’ê yê CHP’ê Zekî Kiliçaslan bal kişand ser grevên birçîbûnê û wiha got: “Divê muxalefet bêtir çalakiyên grevê birçîbûnê bibîne. Ji aliyê me hemûyan ve mijara xwerexnekirinê ye.”

Endamê Meclisa Partiya Gel a Komarê (CHP) Zekî Kiliçaslan hilbijartina herêmî û grevên birçîbûnê nirxandin. Kiliçaslan diyar kir ku îtîfaqa AKP’ê û MHP’ê wek “pirsgirêka bekayê” li hilbijartinê dinêre û hilbijartina herêmî jî ji bo muxalefetê di mijara demokratîkbûnê de gelek grîng e. Kiliçaslan da zanîn ku Tirkiye di bin şertên antî demokratîk de dikeve hilbijartinê û wiha got: “AKP û MHP dixwazin rejîma antî demokratîk konsolide bikin û li ser vê yekê jî dethilatdariyê parve dikin. Ji bo me jî hilbijartina herêmî gelek grîng e. Li dijî van pêkanînên antî demokratîk divê em li her qadê têkoşîna xwe bidomînin. Ji bo ku hilbijartin qadek wiha ye têkoşîn ji bo me girîng e. Di polîtîkaya tifaqan de divê polîtîkayek tifaqan a ku HDP jî di nav de cih bigire hebûya. Tevî van hemû polîtîkayan jî stratejiya HDP’ê ya hilbijartinê gelek bi nirx e.”

Kiliçaslan bal kişand ser grevên birçîbûnê yên li dijî neheqiyê ku hatine destpêkirin û wiha got: “Leyla Guven, Eren Erdem û nêzî 281 girtî bi daxwazên ji bo edalet û hiqûqê di grevên birçîbûnê de ne. Di mijara grevên birçîbûnê de divê her kes xwe rexne bike. Lazim e van çalakiyên greva birçîbûnê ji aliyê muxalefetê ve bêtir bên dîtin. Lê dîsa jî ji bo me hemûyan mijara xwerexnekirinê ye. Muxalefet di bin zextên desthilatdariyê de dieciqe. Polîtîka û rojeva desthilatdariyê bandorê li ser muxalefetê dike. Em neçar in xwe rexne bikin. Divê em hemû bi hev re hîn bêtir grevên birçîbûnê derxin pêş, bibînin û bikin rojeva xwe ya sereke. Her dema grevên birçîbûnê karektera desthilatdariyê daye nîşandan. Heke em bêtir greva birçîbûnê bibînin, dê ewqas jî guhertina desthilatdariyê pêkan be.”

Kiliçaslan di mijara grevên birçîbûnê de desthilatdarî û saziyên edaletê hişyar kirin û xwest di çarçoveya girêdana peymanên navneteweyî û rêgezên mafên mirova yên bingehîn de gav biavêje. ENQERE