Rojnameger Kurşun nehat berdan

Xebatkarê rojnameya Azadiya Welat a bi KHK’ê hatibû girtin Çetîn Kurşun ku bi îdiaya têkiliya wî bi ‘Ciwannews.news’ê re heye hatiye girtin, salek piştre derket pêşberî dadgeriyê. Kurşun nehat tehliyekirin  û doz hat taloqkirin

Xebatkarê rojnameya Azadiya Welat (bi Biryarnameya Di Hukmê Qanûnê de hatibû girtin) Çetîn Kurşun tevî birayê xwe Sedat Kurşun, di 6’ê sibata sala 2018’an de bi hinceta ‘têkiliya wî bi Ciwannews.news’ê re heye’ hate binçavkirin. 13 roj piştî binçavkirinê rojnameger Çetîn Kurşun hate girtin. Salek piştre jî yekemîn danişîna doza Kurşun li 2’yemîn Dadgeha Cezayên Giran a Mêrdînê hate dîtin. Di doza ku Kurşun bi îdiaya ‘endamtiya rêxistinê’ dihat darizandin de birayê Kurşun ê bi negirtî tê darizandin jî amade bû.

Di heman demê de parêzerên Kurşun û xizmên wî jî di danişînê de amade bûn. Kurşun piştî tespîta nasnameyê dest bi parastinê kir. Rojnameger Çetîn Kurşun îdiayên der barê wî de red kirin û tehliyeya xwe xwest.

Piştî parastina parêzvanan, heyeta dadgehê biryara xwe da. Heyeta dadgehê biryara berdewama rewşa girtî ya Kurşun da û danişîna duyemîn taloqî 30’ê nîsanê kir. MÊRDÎN