YPS: Roj roja berxwedanê ye

Koordînasyona YPS’ê salvegera komploya navneteweyî şermezar kir û wiha got: “Grevên birçîbûnê di asta krîtîk de ne. Divê gelê me li dora vê berxwedanê bibe yek. Roj roja berxwedanê ye.”

Koordînasyona YPS’ê bi boneya salvegera 20’emîn a Komploya Navneteweyî ya 15’ê Sibatê ya li dijî Rêberê Gelê Kurd Abdullah Ocalan hate kirin, daxuyaniyeke nivîskî da. YPS’ê di daxuyaniya xwe de bal kişand ser armanca hêzên navneteweyî yên li Rojhilata Navîn û astengiyên li pêş wan. YPS’ê di daxuyaniya xwe de ev tişt ragihand: “Şerê Cîhanê yê 3’emîn ku niha li Rojhilata Navîn diqewime, bi komploya navneteweyî ya berî 20 salan ku li dijî Rêber Apo hate kirin, dest pê kir. Li pêşiya destwerdana hêzên navneteweyî li Rojhilata Navîn astengiya herî mezin Rêber Apo û tevgera me ya azadiyê bû. Ji ber ku di nava 40 salên dawî de hem li Kurdistanê hem jî li herêmê bi navê demokrasî, sosyalîzm û azadiyê çi hatibe kirin, li dora Rêber Apo û tevgera azadiyê hatin kirin. Lewma ji bo fetisandina tevgera azadiyê ya kurd û tasfiyekirina wê, beriya her tiştî dixwestin Rêber Apo bê bandor bikin. Xwestin Rojhilata Navîn ji nû ve dîzayn bikin û gelê kurd dîsa bikin hewcedarê hinekan. Yek ji sedemên herî girîng ên hedefkirina Rêberê me ku afirînerê kurdê azad e, ev bû.”

Daxuyanî wiha didome: “Di pûçkirina komploya navneteweyî de berxwedana Rêberê me ya di dema dîlgirtinê de rola sereke lîst. Di heman demê de şehîdên me yên bi dirûşma ‘Hûn nikarin roja me tarî bikin’ ku li zindanan dest pê kirin û li her devera gelê me lê ye belav bû, li dora rêberê me bûn xelekek ji agir. Em şehîdên xwe yên pîroz careke din bi bîr tînin û soza xwe ya dilsoziya bi bîranîna wan re dubare dikin. Serhildanên mezin ên gelê me ku li çar parçeyên Kurdistanê û her devera dinyayê li dijî hêzên komploger pêk anîn, berxwedana serketî ya hêzên gerîla ku bi lehengî û fedakariyeke mezin li dijî dijmin nîşan dan, bi navê têkoşîna azadiyê ya gelan cihekî girîng girtin.”

Hesabên komplogeran têk birin

YPS’ê destnîşan kir ku di dîrokê de kesek bi komployeke navneteweyî ya ewçend mezin û berfireh dîl nehatiye girtin û ev tişt ragihand: “Rêberê me li dijî vê komployê berxwedaneke mezin nîşan da û hesabên komplogeran têk bir, komplo pûç kirin. Tevgera Azadiyê ya Kurd bi têkoşîna dijî vê komployê re bêhtir mezin bû û reh berda her devera Kurdistanê. Sedema êrîşkariya faşîst a sîstema AKP-MHP’ê ku êrîşî her tiştên bi navê kurdîtiyê dike, ev pêşketin e. Rêber Apo bi paradîgmaya xwe ya demokratîk û azadîparêz, hem ji bo gelê kurd bû hêvî hem jî ji bo gelên bindest. Îro ji çar aliyên dinyayê zarokên alman, kanadayî, ereb, tirk û gelên din li Rojava, li çiyayên Kurdistanê şer dikin. Ev yek mînaka herî mezin e ku nîşan dide, rêbaza têkoşînê ya Rêberê li dijî komploya navneteweyî bi ser ketiye. Rêberê me êdî ne tenê rêberê gelê kurd, rêberê gelan hemûyan e.”

Grev gihîştiye asteke kirîtîk

Di daxuyaniyê de YPS’ê bal kişand ser grevên birçîbûnê jî û destnîşan kir ku grevên birçîbûnê gihîştine asteke krîtîk. YPS’ê ev tişt anî ziman: “Rêberê me hîn jî di nava sîstema îşkenceyê ya Îmraliyê de tê hiştin. Tecrîd û rewşa ji esaretê jî wêdetir weke îşkenceya li dijî gelê kurd tê dîtin. Ji ber vê yekê, grevên birçîbûnê yên bi pêşengiya Leyla Guven dest pê kirin, hem li girtîgehan, hem li parçeyên Kurdistanê, hem jî li Ewropayê belav bûne. Grevên birçîbûnê gihaştine asteke krîtîk. Pewîst e gelê me li dora vê berxwedanê bibe yek, li her devera Kurdistanê belav bikin û ji bo şikandina tecrîdê çi ji dest tê bike. Roj roja berxwedanê ye. Roja azadiya Rêber Apo, azadiya Kurdistanê ye.”

Heta azadiyê dê têbikoşin

Di dawiya daxuyaniya xwe de jî YPS’ê wiha got: “Li ser vê bingehê, di salvegera 20’emîn a komploya navneteweyî ya dijî Rêberê me de, di serî de Amerîka, Îngilistan, Îsraîl û Almanya em hemû hêzên di nava komployê de cih girtine şermezar dikin. Bi navê YPS’ê em soz didin ku bi ruhê berxwedana xwerêveberiyê, bi rêbaza şer a Zeryan û Çiyageran em ê li ber xwe bidin û heta azadiya fizîkî ya Rêberê xwe em ê têbikoşin.” BEHDÎNAN