aram

Xezeba Zeytûnê: 8 çete û îstixbaratên tirk hatin kuştin

Navenda Nûçeyan

Odeya Çalakiyan a Xezeba Zeytûnê, teqîna erebeya bombebarkirî ya duh li ser Pira Xendûra ya herêma Cerablusê pêk hat, girt ser xwe û diyar kir ku 8 çete di çalakiyê de hatine kuştin

Duh li bajarokê Xendûra yê gundewarên rojavayê Cerablusê ku ji aliyê leşker û çeteyên dewleta tirk ve hatiye dagirkirin, teqînek pêk hat. Di encama teqînê de 4 çete û 4 jî endamên îstixbarata tirk hatin kuştin.

Odeya çalakiyan a Xezeba Zeytûnê bi daxuyaniyekê teqîna erebeya bombebarkirî girt ser xwe û wiha got: “Ev çalakî di çarçoveya çalakiyên tolhildanê yên li bakurê Sûriyeyê de ye. Ev çalakî hesabpirsîna çeteyên ku tev li dagirkirina Efrînê bûn, şêniyên wê dan koçberkirin û kiryarên terorîst li ser gel pêk anîne.”

Odeyê diyar kir ku 4 çete di teqîna bi navê ‘Emniyê Izaz’ de hatine kuştin. Navên çeteyên ku hatine kuştin wiha ne; Elewî Neyîf, Emîr Dîbo, Mihemed El Şêx Neyîf ji bajarê Til Rifet in. Yên din jî kesê bi navê Rebî El Rebî ji bajarê Kefrê ye û 4 çete jî ji îstixbaratên tirk in.

Odeyê destnîşan kir ku çalakiya wan di dema çalakiya Efrînê de pêk hat û tê de bi dehan çeteyên dewleta tirk hatin kuştin û di daxuyaniyê de teqez kir ku dê çalakiyên xwe li dijî kesên ku destê wan ketiye xwîna şêniyên Efrînê pêk bînin û tola wan hilînin.