Li girtîgeha Kandirayê gardiyanan bi ser odeyên girtiyan de girt

OHD’ê bi daxuyaniyekê ragihand ku gardiyanan îro li Girtîgeha Jimar 1 a Tîpa F ya Kandirayê bi ser odeyên girtiyan de girtine. Parêzeran got ku gardiyanan dest danîne ser radyo, name û nîşeneyên girtiyan û dixwazin têkiliya wan a bi derve bi birin

Zext û zordariya li ser girtiyên li girtîgehên bakurê Kurdistanê û Tirkiyeyê bi taybet jî piştî destpêkirina çalakiyên greva birçîbûnê yên bêdem û bêdorveger û rojiya mirinê ku ji bo rakirina tecrîda girankirî ya li ser Rêberê Gelê Kurd Abdullah Ocalan hatin destpêkirin, gihîştin lûtkeyê. Yek ji van girtîgehan jî Girtîgeha Jimar 1 a Tîpa F ya Kandirayê ye.

Parêzerên endamên Komeleya Hiqûqnasên Ji bo Azadiyê (OHD) têkildarî binpêkirinên li girtîgeha Kandirayê daxuyaniyek dan. Di daxuyaniyê de hat ragihandin ku gardiyan li qawîşên girtiyan lêgerînên keyfî dikin û dest danîne ser amûrên wan ên ragihandinê.

Pêkanînên keyfî

Di berdewamiya daxuyaniyê de jî ev agahî bi raya giştî re hatin parvekirin: “Îro gardiyanan li Girtîgeha Jimar 1 a Tîpa F ya Kandirayê bi ser 3 odeyan de girt. Di van odeyan de muwekîlên me yên di rojiya mirinê de jî hene. Gardiyanan di lêgerînê de dest danîn ser radyo, name û nîşeyên girtiyan. Li gorî agahiyên muwekîlên me, rayedarên girtîgehê dixwazin pêwendiya bi girtiyan qut bikin û agahî girtina wan asteng bikin. Ev lêgerîn bi awayekê keyfî hatiye kirin.”

Daxuyanî wiha bi dawî bû: “Em ê der barê mijarê de serlêdanên hiqûqî bikin. Bi pêkanînên keyfî, nikarin agahî girtina muwekîlên me asteng bikin.” STENBOL

Dikarî Biecibînî