Ji 32 saziyan têkildarî grevê daxuyaniya hevpar

Li Edeneyê 32 sazî û nûnerên partiyên siyasî bi daxuyaniyeke hevpar bal kişandin ser rojiya mirinê û greva birçîbûnê û xwestin demildest daxwazên girtiyan bên qebûlkirin

Bi banga Komeleya Mafên Mirovan (ÎHD) a Edeneyê, Odeya Tabîban, Baro, Konfederasyona Sendîkayên Kedkarên Cemaweriyê (KESK) û Konfederasyona Sendîkayên Karkerên Şoreşger (DÎSK), 32 sazî û nûnerên partiyên siyasî ji bo balê bikişînin ser rojiya mirinê û grevên birçîbûn daxuyaniyeke hevpar dan. Her wiha malbatên girtiyan, dayik û parlamentera HDP’ê ya Edeneyê Tulay Hatîmogllari jî piştî çalakiya rûniştinê ya li Parqa Îsmet Înonuyê tev li daxuyaniyê bûn.

Di daxuyaniya hevpar de parêzer û serokê ÎHD’ê yê Edeneyê Îlhan Ongor axivî û diyar kir ku daxwazên girtiyan li gorî çarçoveya hiqûqê ye û divê daxwazên wan bên qebûlkirin. Îlhan destnîşan kir ku rewşa girtiyan gihiştiye asta krîtîk û wiha got: “Qebûlkirina daxwazên girtiyan ji hêla îktîdarê ve ne evqas zehmet e. Ji bo vê ne hewce ye ku qanûn bên sererastkirin.”

Di axaftina xwe de Îlhan bal kişand ser agahiyên ku hatine bi dest xistin û wiha dirêjî da axaftina xwe: “Ji hêla heyet û hiqûqnasên serbixwe ve me çend agahî berhev kirin. Gelek girtiyan, bi pirsgirêkên heyî re ketin greva birçîbûnê. Niha girtiyan bi pirsgirêkên dîtin, bihistandin, tansiyan, jibîrkirin, germbûna laşê wan û nikarin vexwarinê vexwin re rû bi rû ne. Niha rewşa girtiyan hatiye asta krîtîk. Divê demildest heyetên serbixwe yên tenduristiyê û yên hiqûqnasan biçin girtîgehan.”

Her wiha Îlhan di dawiya axaftina xwe de bal kişand ser şîdeta li hemberî dayikên girtiyan û wiha got: “Li hemberî daxwazên dayikan êrîşeke tund pêk tê. Em êrîşa li hemberî dayikan şermezar dikin.” EDENE

Dikarî Biecibînî