Gerîla li Çelê, Avaşîn û Bestayê li artêşa tirk da

HPG’ê bi daxuyaniyekê ragihand ku hêzên wan li Colemêrg, Şirnex û Avaşînê li artêşa tirk xist. HPG’ê ragihand ku di çalakiyan de 4 leşkerên artêşa tirk hatine kuştin û di êrîşên hewayî de jî 2 hevalên wan jiyana xwe ji dest dane

Navenda Ragihandin û Çapemeniyê ya HPG’ê der barê çalakiyên hêzên wan ên li dijî artêşa tirk û êrîşên hewayî, daxuyaniyeke nivîskî weşand. Di daxuyaniyê de HPG’ê destnîşan kir ku hêzên wan li navçeya Çelê ya Colemêrgê, li herêma Avaşîn û li herêma Besta ya Şirnexê li dijî hêzên artêşa tirk çalakiyên bi bandor pêk anîne.

HPG’ê diyar kir ku hêzên wan di çarçoveya Pêngava Şoreşgerî ya Şehîd Bager û Şehîd Ronya de li dijî artêşa tirk rêzeçalakî pêk anîn. HPG’ê da zanîn ku hêzên wan di 12’ê hezîranê saet di 22:50’an de li Tepê Xwedê yê herêma Avaşîn a Herêmên Parastinê yên Medyayê li dijî leşkerên artêşa tirk çalakiya sekvanî pêk anîne û leşkerek hatiye kuştin. HPG’ê ragihand ku hêzên wan di 13’ê hezîranê saet di 01:00’an de jî cara duyemîn li heman yekîneyê xistine û leşkereke din hatiye kuştin. HPG’ê daxuyand ku artêşa tirk saet di 02:00’an de bi helîkoptera Skorsky kuştî û birîndarên xwe ji herêmê rakirine.

Li Çelê çalakî

Daxuyaniya HPG’ê wiha dom kir: “Di 14’ê hezîranê saet di 04:30’an de hêzên me li dijî lşekerên dagirker ên li Girê Şehîd Bager ê navçeya Çelê ya Colemêrgê çalakî pêk anî. Di çalakiyê de li çeper û baregehên dijmin hate xistin. Kuştî û birîndarên dijmin nehatin tespîtkirin. Di heman rojê saet di 04:30’an de panelên rojê, kamerayên mobese û gelek alavên leşkerî yên dijmin ên li Girê Devê Masî yê Çelê hatin îmhakirin.”

Li Bestayê 2 leşker hatin kuştin

Têkildarî çalakiya li Bestayê jî HPG’ê ev agahî dan: “Di çarçoveya Pêngava Tolhildanê ya Şehîd Medya Mawa û Şehîd Rizgar Gever de hêzên me di roja 14’ê hezîranê saet di 09.00’an de li dijî leşkerên li ser girê Deriyê Beroj ê li herêma Şehrîban a Bestayê ku ser bi Şirnexê ve ye, çalakî pêk anî. Di çalakiyê de derbên giran li dijmin hatin xistin û 2 leşkerên dagirker hatin kuştin. Hêzên me, bi hevdemî makîneyeke kar a dijmin jî rûxand.”

Êrîşên hewayî

Herî dawî jî HPG’ê der barê êrîşên hewayî yên li dijî Herêmên Parastinê yên Medyayê ev agahî parve kirin: “Di 12’ê hezîranê saet di 13.45’an de balafirên şer ên dewleta tirk a dagirker derdora gundê Yekmalê yê li herêma Metînan, di 13’ê hezîranê saet di 23.30’an de herêma Şehîd Bêrîtan a Xakûrkê û di 14’ê hezîranê saet di 19.15’an de jî herêma Şehîd Şerîf a Xakûrkê bombebaran kir. Di êrîşa Yekmalê de zirar gihîşt mal û milkê şêniyan û li herêma Şehîd Baran jî 2 hevalên me şehîd bûn. Em ê piştre nasnameyên hevrêyên xwe ji raya giştî re aşkera bikin.” BEHDÎNAN

Dikarî Biecibînî