Hevserokên HDP û DBP’ê yên Rihayê hatin berdan

Hevserokên HDP û DBP’ê yên Rihayê ku ji ber çalakiya greva birçîbûnê hatibûn girtin, di danişîna duyemîn de tehliye bûn

Bi armanca piştgiriya bi çalakiyên greva birçîbûnê yên ji bo rakirina tecrîda girankirî ya li ser Rêberê Gelê Kurd Abdullah Ocalan, rêveberiyên HDP û DBP’ê yên Rihayê ji bo çend rojan ketibûn greva birçîbûnê. Lê çalakvan rastî êrîşa polîsan hatin û di encamê de hevseroka HDP’ê ya Rihayê Aliye Kizildamar û hevserokê DBP’ê ya Rihayê Bekîr Karakeçîlî hatibûn binçavkirin û girtin. Danişîna duyemîn a dozê li 6’emîn Dadgeha Cezayê Giran a Rihayê hate dîtin.

Tevî hevserokan, welatiyên bi navên Hadle Ogur û Şukru Turgut ên girtî jî tên darizandin. Siyasetmedar bi îdiaya ‘alîkarî dane rêxistinê’ tên darizandin. Di danişînê de rêveberên HDP û DBP’ê û parêzer amade bûn. Danişîn piştî tespîtkirina nasnameyan dest pê kir. Di danişînê de hevserok Kizildamar û Karekeçîlî parastina xwe kirin û tawanbariya sûcên ku li wan tên kirin, red kirin.

Her wiha parêzeran jî xwest ku miwekîlên wan bên berdan. Dadgehê piştî navbereke kin, biryara xwe aşkera kir. Dadgehê biryara berdana hevserokan da. Danişîn taloqî 24’ê îlonê hate kirin. RIHA

Dikarî Biecibînî