Ji bo çareserkirina pirsgirêkan hemfikir in

Fermandarê giştî yê Hêzên Sûriya Demokratîk Mazlûm Ebdî diyar kir ku nêrînên wan û yên rayedarên Koalîsyona Navneteweyî, der barê mijarên di civînê de hatine nirxandin, yek bûn

Navenda Ragihandinê ya Hêzên Sûriya Demokratîk (HSD) diyar kir ku civînek di navbera fermandarên wan Mazlûm Ebdî û fermandarê Herêma Navîn a Fermandariya Navendî ya Koalîsyona Navdewletî Kenneth McKenzie de pêk hat û di civînê de dosya û mijarên girîng hatin nîqaşkirin.

Îro serê sibehê fermandarê giştî yê HSD’ê Mazlûm Ebdî û fermandarên HSD`ê, fermandarê Herêma Navîn a Fermandariya Navendî ya Koalîsyona Navneteweyî Kenneth McKenzie û nûnerê Amerîkayê yê taybet ê koalîsyonê William Robak li herêma Firatê pêşwazî kirin.

Li gorî Navenda Ragihandiê ya HSD’ê, mijarên ku di civînê de hatin nîqaşkirin, ev in:

Gefên ewlehiyê yên li ser sînorê di navbera Bakurê Sûriye û Tirkiyeyê de.

Planên kar û koordîneyê di navbera Hêzên Sûriya Demokratîk û Koalîsyona Navneteweyî de ji bo berdewamkirina şerê li dijî terora DAIŞ’ê.

Pirsgirêka kamp û dîlên DAIŞ’ê yên di destê Hêzên Sûriya Demokratîk de.

Navenda Ragihandinê ya HSD’ê diyar kir ku fermandarê giştî yê hêzên HSD’ê Mezlûm Ebdî daxuyaniyeke kurt da çapemeniyê û wiha got: “Nêrîna di navbera Hêzên Sûriya Demokratîk û Koalîsyona Navneteweyî de der barê piraniya mijarên ku hatin nîqaşkirin de, wekî hev bûn.”

Her wiha Ebdî anî ziman ku her du aliyan li ser rêbaza diyalogê ji bo çareserkirina pirsgirêkên heyî û koordîneya ji bo tunekirina DAIŞ’ê bi awayekî giştî tekez kir. QAMIŞLO

 

Dikarî Biecibînî