aram

‘Em nehêlin xaka me dagir bikin’

Bi sedan şêniyên navçeya Dirbêsiyê berê xwe da navçeya Serêkaniyê daku beşdarî konê mertalên zindî yê li ser sînor hatiye vedan bibin. Şêniyên ku tevli çalakiya mertalê zindî ya ji bo şermezarkirina gefên Tirkiyeyê yên li ser herêmên Bakur û Rojhilatê Sûriyeyê nerazîbûn nîşan dan û wiha gotin: “Em nehêlin xaka me dagir bikin.”

Ji bo şermezarkirina gefên dewleta tirk ên li ser herêmên Bakur û Rojhilatê Sûriyeyê, ev 3 roj e şêniyên Serêkaniyê konê mertalên zindî li ser sînor vedaye. Di bin kon de li kêleka şêniyên Serêkaniyê, şêniyên navçeya Dirbêsiyê jî dewrê digirin.

Şênî li pêşiya geraca navçeyê kom bûn û bi dehan erebeyan berê xwe da navçeya Serêkaniyê da ku beşdarî konê çalakiyê bibin.Welatiya bi navê Nûra Mihemed wiha got: “Em îro berê xwe didin navçeya Serêkaniyê da ku em ji dewleta tirk a dagirker re bibêjin em mertalên zindî li pêşiya hemû cureyên êrîşan disekinin û tekez dikin em ê li pêşiya Erdogan li ber xwe bidin û nehêlin xaka me dagir bikin.”

Her wiha welatiyê bi navê Cemîl Elî jî gefên Tirkiyeyê şermezar kirin û wiha got: “Piştî serkeftinên ku hêzên me pêk anîn, gefên dagirkeriya tirk ji herêmên me re zêde bûn, bi rêya gefên xwe armanc dike ewlehiya herêmên me têk bibe. Lê em wek pêkhateyên herêmê, nahêlin Erdogan bigihîje armanca xwe.” HESEKÊ

 

Dikarî Biecibînî