Şerê di navbera gerîla û artêşa tirk de didome

HPG’ê bi daxuyaniyekê ragihand ku di navbera hêzên wan û artêşa tirk de li Dêrsimê pevçûn derket û 2 gerîla di pevçûnan de jiyana xwe ji dest daye. HPG’ê diyar kir ku artêşa tirk li Sêrt û Herêmên Parastinê yên Medyayê jî bombebaran kirine

Navenda Ragihandin û Çapemeniyê ya HPG’ê têkildarî şer û pevçûnên di navbera hêzên wan û hêzên artêşa tirk de qewimîn, daxuyaniyeke nivîskî parve kir. HPG’ê da zanîn ku di navbera hêzên wan û artêşa tirk de li Dêrsimê şer derketiye.

HPG’ê destnîşan kir ku hêzên artêşa tirk di 14-25’ê îlonê de li qadên Mêrga Çepera, Şehîd Cafer û Mervanî yên bi ser navenda Dêrsimê ve operasyon daye destpêkirin û ev agahî dan: “Artêşa TC’ê ya dagirker ku kontrola qadê kir, di heman rojê de bêencam vekişiya.”

Di berdewamê de jî HPG’ê da zanîn ku di 24’ê hezîranê de li geliya Harçik a bi ser navenda Dêrsimê ve di navbera hêzên wan û artêşa tirk de şer derket û kitekitên şer wiha parve kirin: “Di şer de 2 hevrêyên me yên ku derbên giran li yekîneyên dijmin dane, heta bi guleya xwe ya dawî bi lehengî şer kirin û şehîd bûn. Agahiyên nasnameyê yên hevalên me yên şehîd piştre bi raya giştî re dê were parvekirin.”

Êrîşên hewayî

Daxuyaniya HPG’ê wiha bi dawî bû: “Di 29’ê îlonê de artêşa TC’ê ya dagirker qada Beşa û derdora gundê Şûx a Zezxêr a Sêrtê bombebaran kirin. Dema ku agahiyên berfireh hatin em ê encamên bombebaranê bi raya giştî re parve bikin. Di 4’ê cotmehê saet di navbera 11.00 û 18.00’an de jî balafirên şer ên artêşa TC’ê ya dagirker ji Qadên Parastinê yên Medyayê, gundê Çemrobotkî yê herêma Garê,  qada Deşta Nehlê û qada Werxelê ya herêma Avaşînê bombebaran kirin. Di van bombebaranan de tu windahiyên me çênebûn lê li qadên daristanî şewat derket.” BEHDÎNAN

Dikarî Biecibînî