KCDK-E: Li dijî tifaqa qirker tekane rê berxwedan e

Navenda Nûçeyan

Dîwana Hevserokatiyê ya KCDK-E’yê piştî gefên dagirkeriyê yên dewleta tirk û vekişîna hêzên DYA’yê, daxuyaniyek da û bang li gelê kurd kir ku bi ruhê Kobanê xwedî li Rojava derkevin. KCDK-E’yê daxuyand ku li dijî tifaqa faşîst û qirker a AKP-MHP’ê tekane rê, berxwedan e

Kongreya Civaka Demokrastîk – Ewropa (KCDK-E) yê têkildarî gefên dewleta tirk û vekişîna hêzên koalîsyona navdewletî ya li ser sînorê rojavayê Kurdistanê daxuyaniyeke nivîskî weşand. Di daxuyaniyê de KCDK-E’yê diyar kir ku tifaqa faşîst a AKP-MHP, Ergenekon û Perînçek a bi serkêşiya Erdogan dixwaze bi şer û qirkirinê Kurdistanê dagir bike.

KCDK-E’yê destnîşan kir ku armanca vê tifaqê ew e ku bi şer destkeftiyên gelê kurd û gelên herêmê têk bibin. Daxuyanî wiha dom kir: “Çeteyên DAIŞ’ê û El Nusrayê jî di nava vê tifaqê de hene. Ev bloka li dijî kurdan a ku dixwaze gelên bakur û rojhilatê Sûriyeyê bi rengekî topyekûn bifetisîne, amadekariya şerekî topyekûn dike. Mîna li Efrîn û Kobanê, dixwazin şer bikin û dagir bikin. Ji ber vê yekê jî divê gelê me li dijî van gefên Erdogan ê dîktator bi ruhê seferberiyê bersivê bide û armanca wan a qirkirinê di qirika wan de bihêle.”

‘Tekane rê têkoşîn e’

Daxuyaniya KCDK-E’yê wiha bi dawî bû: “Divê gelên asur, suryan, kurd, ereb, êzidî, elewî û hwd. bizanin ku gefeke mezin a êrîşê li wan tê xwarin. Ji ber vê jî divê li her devereke dinyayê yên ku lê ne, xak û rûmeta xwe biparêzin û bi vê têgihiştinê seferber bibin. Em bang li her kesî dikin ku bi ruhê Kobanê rabin ser pêyan û li her devera dinyayê li ber xwe bidin û bi ruhê seferberiyê tevbigerin. Berxwedan tekane rê ye. Li dijî gefên qirkirinê û dagirkeriyê yên tifaqa faşîst a AKP-MHP’ê tekane rê, têkoşîne.”

Dikarî Biecibînî