Aldar Xelîl ji bo çalakiyên 12’ê cotmehê bang kir

Navenda Nûçeyan

Endamê Desteya Rêveber a TEV-DEM’ê ji bo xwedîderketina li bakur û rojhilatê Sûriyeyê bang li raya giştî kir û wiha got; ‘Dîrok û exlaq bangî we dike. Ez bang li gelê Kurdistanê û hemû cîhanê dikim ku tev li çalakiyên 12’ê cotmehê bibin

Endamê Desteya Rêveber a Tevgera Civaka Demokratîk (TEV-DEM) Aldar Xelîl li ser hesabê xwe yê twîtterê têkildarî gefên dagirkeriyê yên dewleta tirk ên li dijî bakur û rojhilatê Sûriyeyê peyamek parve kir. Di peyama xwe de Xelîl bang li gelê kurd û raya giştî ya cîhanê kir û xwest ku li dijî hewldana dagirkeriyê di 12’ê cotmehê de biherikin qadan.

Banga Aldar Xelîl wiha ye:

“Biryara gelê me ya parastinê, ji bo cîhan û mirovahiyê ye. Heman gelê me yê parêzvan û fedakar îro rastî gefên qirkirin û komkujiyan tê. Tevahî cîhan li hemberî vê qirkirinê ye. Ji ber ku mirovahî,  demokrasî, aramî, jiyana hevbeş û nirxên hemû civakan di kesayeta gelê me de bi hemû  pêkhateyên wê yên pirreng ên bakur û rojhilatê Sûriyeyê re armanc tên girtin.

Ji bo şermezarkirina gefên dewleta tirk ên li ser bakur û rojhilatê Sûriyeyê dê li temamiya cîhanê di roja şemiyê de (12’ê cotmehê) çalakî bên lidarxistin. Tevlêbûna van çalakiyan ji bo helwesteke ji bo aştiya Sûriye, tevahiya herêmê û cîhanê girîng e. Helwesteke ji bo pêşîlêgirtina komkujiyêne ku der barê gelê me de tên plankirin.

Di heman demê de çalakî ji bo hişyarbûna wijdan, exlaq û demokrasiyê dê bibe sedem. Hemû gelên me, dost û hogir, aştîxwaz, dijberên faşîzm û qirkirinê, dîrok û exlaq bangî we dikin.”

Dikarî Biecibînî