Li Riha û Amedê 6 kes hatin binçavkirin

Navenda Nûçeyan

Operasyona qirkirina siyasî ya li dijî gel û siyasetmedarên kurd ranaweste. Polisan, li Amedê bi ser gelek malan de girt û 5 kes binçav kirin. Li Rihayê jî Hevserokê HDP’ê yê Bîrecîkê Omer Karadag hat binçavkirin. Her wiha dema binçavkirina hevşaredarên Erdîşê Yildiz Çetîn û Bayram Çîçek ji bo 4 rojan hat dirêjkirin

Polisan, serê sibejê li Amedê bi ser gelek malan de girt. Polisên Tevgera Taybet jî tevlî operasyona qirkirina siyasî bûn û Endama Lîjneya Rêberiya Navendî (MYK) ya Meclisa Jinan a Sosyalîst (SKM) Safiye Ok û endamên Federasyona Komeleyên Ciwanan ên Sosyalîst Helîn Yagmûr, Sedat Turlu û Osman Demîr derb kirin û binçav kirin. Li Rezan jî polisan bi ser mala Bariş Erîşen de girt û ew binçav kirin. Polisan kesên binçavkirin birin Miduriyeta Polisan a Amedê.

Polîsan Hevserokê HDP’ê yê Bîrecîkê binçav kirin

Li aliyê din polîsan bi ser mala Hevserokê Partiya Demokratîk a Gelan (HDP) yê Bîrecîk a Rihayê Omer Karadag de girtin û deriyê mala wî şikandin. Polîsan piştî li mala Karadag lêgerîn kirin ew binçavkirin û birin Midûriyeta Polîsan a Rihayê. Sedema binçavkirina Karadag nehat zanîn.

Dema binçavkirina hevşaredarên Erdîşê hat dirêjkirin

Her wiha dema binçavkirina hevşaredarên Erdîşê Yildiz Çetîn û Bayram Çîçek ku di 15’ê cotmehê de hatibûn binçavkirin ji bo 4 rojan hat dirêjkirin. Hat hînbûn ku biryara nepeniyê li ser dosyayên hevşaredaran e û lêpirsîna derbarê wan de li ser îfadeyên şahidekî veşartî hatiye destpêkirin.

Dikarî Biecibînî