HSD’ê bîlançoya roja dawî aşkera kir

Navenda Nûçeyan

HSD’ê bi daxuyaniyekê ragihand ku tevî agirbestê jî hêzên artêşa tirk a dagirker êrîşên xwe yên li dijî rojavayê Kurdistanê didomîne. HSD’ê diyar kir ku di êrîşên dewleta tirk û çeteyên wê de 16 şervan şehîd bûn û 3 jî birîndar bûn

Navenda Ragihandina Hêzên Sûriyeya Demokratîk(HSD) bîlançoya Berxwedana Rûmetê ya 24 saetên dawî bi daxuyaniyekê bi raya giştî re parve kir. Di daxuyaniyê de HSD’ê destnîşan kir ku hêzên wan li gorî agirbesta hatiye ragihandin tevdigerin lê artêşa dewleta tirk a dagirker û komên terorîst ên alîgirê wê, êrîşên xwe didomînin.

Daxuyaniya HSD’ê wiha dom kir:

SERÊKANIYÊ

* Artêşa tirk dewleta tirk a dagirker gundên Serêkaniyê bombebaran kirin û gelek hêz û çekên giran anîn herêmên agirbestê.

* Li derdora gundên Hebeş û Şikêriyê, komên terorîst û artêşa dewleta tirk a dagirker hewldan êrîşên nuqteyên hêzên me bikin.

* Li aliyekî dîtir jî komên terorîst bi çekên giran êrîşî noqteyên me yên cuda kir û hewl dan bi panzêran pêşde werin.

* Hêzên me di çarçoveya parastina rewa de bersiva êrîşan da û şerek li wan noqteyan rû da.

* Hêzên me hewldanên pêşveçûnê şikandin û hiştin ku paş ve bikişin. Lê piştî hewldanên wan hatin şikandin, artêşa dewleta tirk a dagirker bi çekên giran topbaran kir.

* Tevî pêkanîna agirbestê jî, artêşa dewleta tirk a dagirker hêzên xwe li derdora gundên Til Xinzîr û Elokê belav kirin û her wiha hejmareke mezin a çeteyan ji bo êrîşê li wan noqteyan belav kirin.

* Di encama êrîşên artêşa tirk a dagirker a hovane de, 16 şervanên me şehîd bûn û 3 jî birîndar bûn.”

Dikarî Biecibînî