Di dewriyeya hevbeş de artêşa tirk sivîlek qetil kir

Navenda Nûçeyan

Leşkerên tirk ên ku beşdarî dewriyeya di navbera Girkê Legê û Dêrikê bûn, êrîşî gelê herêmê kir. Di encama êrîşê de welatiyê bi navê Serxwebûn Elî hate qetilkirin

Bi navbeynkariya Dewletên Yekbûyî yên Amerîkayê (DYA) û Rûsyayê, di navbera Hêzên Sûriyeya Demokratîk (HSD) û dewleta tirk de peymana agirbestê hatibû ragihandin. Li gorî peymana Soçiyê, dê hêzên leşkerî yên Rûsyayê û yên dewleta tirk a dagirker li ser sînorê rojavayê Kurdistanê dewriyeyê hevbeş pêk bianiya.

Li gorî agahiyên ji herêmê, di çarçoveya lihevkirinê de îro konvoya leşkerî ya hêzên rûs û tirk xwestin li gundê Dêrna Axê yê Girkê Legê ber bi herêma Dêrikê ve biçin. Welatiyên herêmê jî bertek nîşanî hêzên dagirker dan û kevir lê barandin.

Hat zanîn ku hêzên dewleta tirk jî di serî de bombeyên gazê li welatiyan reşandin û piştre jî kete nava girseyê. Di encama êrîşa hêzên artêşa tirk de welatiyê bi navê Serxwebûn Elî hate qetilkirin.

Têkildarî mijarê berpirsê Buroya Ragihandinê yê HSD’ê Mûstefa Balî li ser hesabê xwe ya twîtterê peyamek parve kir û destnîşan kir ku seyareya leşkerî ya dewleta tirk daye ser sivîlekî.

Dikarî Biecibînî