Leşker û polîs bi darê zorê dixwazin cenazeyê Kaya bi şev bê definkirin

Leşker û polîsên dewleta tirk ku di 6’ê kanûnê de li gundê Mûşiyan ê Dutaxê bavê 3 zarokan Mûrat qetil kir, ev 3 roj in cenazeyî nadin malbata wî. Malbata Kaya da zanîn ku hêzên leşker û polîsan zextê li wan dikin ku cenazeyê Kaya bi şev veşêrin

Di 6’ê kanûnê de leşker û polîsan bi ser gundê Mûşiyan ê navçeya Dutax a Agiriyê de girt. Di serdegirtinê de leşker û polîsên dewleta tirk bavê 3 zarokan Mûrat Kaya qetil kir û 10 kes jî binçav kiribûn. Piştre jî polîs û leşkerên tirk şêniyên gund li dibistana gund kom kirin û lêgerîn kirin.

Li gorî agahiyan, leşker û polîsan zextê li malbata Kaya dikin ku îşev cenazeyê Kaya li gund bê definkirin. Leşker ev 3 rojin ku cenazeyê Kaya nadin malbata wî. Têkildarî mijarê endamên malbata Kaya axivîn û ev tişt destnîşan kirin: “Rayedarên leşkerî hatin gund û gotin; ‘An em ê îşev cenazeyî defin bikin, an jî em ê bibin li goristana bêkesan defin bikin.’ Lê me ev yek qebûl nekir. Divê em bi wecibeyên olî cenazeyê xwe defin bikin. Mûrat sivîl bû. Niha dixwazin ku em bi şev cenaze defin bikin.” AGIRÎ

Dikarî Biecibînî