‘Êrîşa li dijî xwendekarên kurd polîtîkayeke dewletê ye’

Nûnerên rêxistinên ciwanan bertek nîşanî êrîşa nijadperest a li dijî 3 xwendekarên kurd ên li Antalyayê da û diyar kir ku êrîşa li dijî xwendekaran parçeyek politikaya dewletê ye

Li Tirkiyeyê di serdemên şer de gotinên nefretê û êrîşên nijadperest zêde dibin rê li ber êrîşan vedike. Her dawî jî li Dibistana Pîşeyî ya Bilind a Zanîngeha Antalyayê êrîşa nijadperest li dijî 3 xwendekarên kurd qewimî.

Xwendekar ji ber êrîşên nijadperest neçar man ku dest ji dibistanê berdin. Nûnerên rêxistinên ciwanan bertek nîşanî êrîşa nijadperest a li dijî xwendekarên kurd dan.

Endamê Meclisa Ciwanan a HDP’ê Murat Yaşar êrîşa nijadperest a li dijî xwendekarên kurd şermezar kir û got ku êrîşên bi vî rengî bêtehamuliya kurdan e û ew van êrîşan nikarin qebûl bikin.

Hevseroka Federasyona Komeleyên Ciwanên Sosyalîst (SGDF) Alev Ozkîraz jî bi bîr xist ku Şîrîn Tosun bi boneya bi kurdî axivî li Sakaryayê hat kuştin û însan tenê ji ber ku bi kurdî diaxivin êrîş li dijî wan pêk tê û tên kuştin û wiha got: “Ev êrîş parçeyek polîtîkaya dewletê ye. Hebûna kurdan qebûl nakin. Dixwazin mafê kurdan û zimanê wan ji holê rakin. Ev polîtîkayek tunekirina kurdan e. Dixwazin civakê bikin yektîp. Em ê wek ciwanên sosyalîst piştgiriya xwe mezintir bikin û van polîtîkayan bişikînin. Em dibêjin ev jî dê bi xweseriya demokratîk û perwerdehiya zimanê zikmakî pêk were.” STENBOL

Dikarî Biecibînî