ÎHD: Jiyana girtiyên nexweş û Demîrtaş di xetereyê de ye

ÎHD’ê têkildarî rewşa girtiyên nexweş û rewşa Selahattîn Demîrtaş de daxuyanî da. ÎHD’ê diyar kir ku 457 jê giran, hezar û 334 girtiyên nexweş hene. ÎHD’ê destnîşan kir ku jiyana girtiyên nexweş û Demîrtaş di xetereyê de ye û divê bên berdan

Komîsyona Girtîgehan a Navenda Komeleya Mafên Mirovan (ÎHD) û şaxa wê ya Stenbolê bi armanca balê bikişînin ser rewşa tenduristiyê ya girtiyên nexweş û hevserokê Partiya Demokratîk a Gelan (HDP) yê berê Selahattîn Demîrtaş, li Şaxa ÎHD’ê ya Stenbolê civîna çapemeniyê li dar xist. Li salona civînê pankarta ‘Bila Selahattîn Demîrtaş û hemû girtiyên nexweş werin berdan’ hatibû daliqandin. Ji parêzerên ÎHD’ê Zeynep Ceren Boztoprak daxuyanî xwend.

Boztoprak diyar kir ku her roja ku diçe şertên girtiyan di warê binpêkirina maf û azadiya wan de giran dibe û ji ber vê yekê jî rewşa tenduristiya girtiyan nebaş dibe. Boztoprak anî ziman ku ji ber rewşa girtîgehan, di demên kin de girtî pê nexweş dikevin û rewşa girtiyan xerab dibe. Boztoprak da zanîn ku niha li girtîgehan bi hezaran girtiyên nexweş li sînorê mirinê ne.

Hezar û 334 girtiyên nexweş hene

Piştre jî Boztoprak destnîşan kir ku li gorî raporên 2019’an ên ÎHD’ê, 457 jê giran hezar û 334 girtiyên nexweş li girtîgehan tên ragirtin û her ku diçe jî rewşa girtiyan nebaş dibe. Boztoprak herî dawî jî bal kişand ser rewşa Demîrtaş û ev agahî dan: “Demîrtaş nexweş ket û piştî 4 rojan sewqî nexweşxaneyê hate kirin. Jiyana Demîrtaş di bin xetereyê de ye. Pêwîste Demîrtaş ê jiyana wî di bin xetereyê de were berdan. Em bang li Wezareta Dadê û berpirsiyaran dikin ku rewşê binpê nekin. Heke tiştek were serê Demîrtaş û girtiyên din, rayedarên dewletê û Wezareta Dadê berpirsiyar in.” STENBOL

Dikarî Biecibînî