‘Gelo dema zarok dihatin tecawizkirin çima kamerayên we girtî bûn?’

Navenda Nûçeyan

Ji bo şermezarkirina windakirina xwendekara zanîngehê Gulistan Doku û tecawizkirina 15 zarokan li Pêrtagê, li Dêrsim, Mêrsîn û Edeneyê daxuyanî hatin dayîn. Parlamenter Alîcan Onlu bertek nîşanî kamerayên polîsan dan û got; ‘Dema ku zarok dihatin tecawîzkirin û jin dihatin qetilkirin gelo çima kamerayên we vekirî nebûn?

Hêzên Ked û Demokrasiyê yên Dêrsimê bi dirûşma ‘Em destûr nadin bêesilkirinê. Em ê xwedî li bajarên xwe, zarokên xwe û pêşeroja xwe xwedî derkevin’ li Qada Seyîd Riza daxuyanî dan. Di heman demê de bi heman boneyê Platforma Jinan a Edeneyê û Platforma Jinan a Mêrsînê jî daxuyanî dan.

Di daxuyaniya li Dêrsimê de gelek nûnerên rêxistinên civakî, parlamenterên HDP’ê Alîcan Onlu û Mehmet Ruştu Tiryakî û nûnerên Hêza Ked û Demokrasiyê ya Dêrsîmê jî amade bûn.  Di çalakiyê de beşdaran windakirina xwendekara zanîngehê Gulistan Doku û tecawizkirina 15 zarokên li Pêrtagê şermezar kirin. Çalakvanan dirûşmên ‘Jin jiyan azadî’ û ‘Dêrsim ranezê li Gulistan xwedî derkeve’ berz kirin.

Di çalakiyê de hevserokê HDP’ê yê Dêrsimê Nurşat Yeşîl got ku li navçeyên Xozat, Pilûr Pêrtagê li ser hev zarok hatin îstîsmarkirin û windabûna Doku bi bîr xist. Yeşîl xwest ku kesên tacîz û tecawizê dikin bên darizandin û cezakirin.

Parlamenter Alîcan Onlu jî di serî de bertek nîşanî kamerayên polîsan da û wiha got: “Li vir ewqas bêrûmetî, taciz û tecawiz zêde  dibin û jin tên qetilkirin, gelo wê demê ev kamera li ku bûn? Mirov hinek şerm dike. Dema li vî bajarî zarok dihatin tacîz û tecawîzkirin çima kamerayên polîs û leşkeran kiryar negirtin? Walî êdî ne walî ye. Di bin berpirsiyariya wî de zarok tên kuştin û jin tên tecawizkirin. Di bin berpirsiyariya te de reng û sincê vî bajarî xera dibe. Divê ev walî demek beriya demekî îstîfa bike.” berî demekê îstîfa bike. Walî dibêje; ‘Li şûna hûn derkevin çiya û siyasetê bikin, fihûş bixêrtir e.’ Ev hişmendiya tecawizkar û dijminê jinê ye. Li temamiya bajar kamera hene û zarok di bin berpirsiyariya we de tên tecawizkirin. Divê hûn derkevin pêşberî kamerayan. Divê li temamiya Kurdistanê li dijî vê bêrûmetiyê têkoşîn belav bibe.”

EDENE

Bi heman boneyê Platforma Jinan a Edeneyê jî li Parka Bi Heykel daxuyanî da. Di daxuyaniyê de gelek jin amade bûn û dirûma ‘Gulistan Doku li ku ye?’ berz kirin. Li ser navê Platformê Prz. Zelal Demîray axivî û diyar kir ku di serdema AKP’ê de tacîz, tecawiz, qetil kirin û cudakarî zêde bûye. Demîray xwest ku di zûtirin dem de aqûbeta Doku bê ronîkirin.

MÊRSÎN

Platforma Jinan a Mêrsînê jî bi heman armancê li avahiya Şaxa Komeleya Mafên Mirovan (ÎHD) a Mêrsînê daxuyanî da. Li ser navê platformê Derya Narli daxuyanî da û wiha got: “Li cihekî wekî Dêrsimê biçûk, midûriyeta polîsan derzî jî winda bibe dikarin bibînin. Çima midûriyeta polîsan Gulistan nabînin? Walî bi qedexeyan dixwaze bajar bêdeng bike. Ji ber bavê Zaynal Aborak ê ku bûye sedema windakirina Gulistan Doku polîs e ew derxistin dervê bajar. Ev pirsên nû ava dikin. Ji bo Doku bê dîtin têkoşîna me dê bidome.”

Dikarî Biecibînî