Akîtê hedef nîşan da dozgeriyê li rojnameger Kirkaya doz vekir

Rojnameya  Akîtê di nûçeyeke de rojnameger Kenan Kirkaya hedef nîşan da bû û li ser vê yekê jî li rojnameger Kirkaya doz hatibû vekirin. Danişîna dozê îro hate dîtin. Şandeya dadgehê doz taloqî 5’ê adarê kir

Yek ji rojnameyên çapemeniya hawîz Akît ku weke rojnameyeke hedefnîşandana siyasetmedar, rojnameger û welatiyan tê zanîn, vê carê jî rojnameger Kenan Kirkaya hedef nîşan da. Di nûçeyeke xwe de îdia kir ku rojnameger Kirkaya ‘Propagandaya rêxistinê kiriye’. Li ser vê yekê jî 32’yemîn Dadgeha Cezayên Giran a Enqereyê li rojnameger bi îdiaya ‘Propagandaya rêxistinê kiriye’ doz vekir. Doza Kirkaya îro hate dîtin.

Di danişînê de rojnameger Kenan Kirkaya û Prz. Nûray Ozdogan amade bûn. Di heman demê de rojnameger Hûseyîn Aykol jî danişîn şopand. Kirkaya di danişînê de îfadeyên xwe yên berê dubare kir û got ku tiştên hatine parvekirin yên wî nînin. Kirkaya da zanîn ku dema girtî, hesabê wî ya Facebookê hatibû hackkirin û wiha domand: “Dema ez girtî li ser hesabê min agahî hatin parvekirin. Di 2018’an de polîsan bi ser mala min de girt û hatim binçavkirin. Piştî rojnameya Akîtê ez hedef nîşan dam.”

‘Ez karê rojnamegeriyê dikim’

Kirkaya diyar kir ku ji ber nivîsa wî ya di rojnameya Yenî Yaşamê de doz lê hatiye vekirin û wiha pê de çû: “Ev tiştekî rasthatî nîne. Bi salan e rojnamegeriyê dikim.  Tiştên min parve kirin nûçe nînin. Ez karê rojnamegeriyê dikim. Ez beraeta xwe dixwazim.”

Parêzer beraeta Kirkaya xwest

Parêzer Ozdogan jî got ku parvekirinên behsê xeberê di salên 2014, 2015 û 2017’an de hatine parvekirin û wiha derbirî: “Polîs dikarin bi rehetî xwe bigihÎnin muwekîlê min. Lê li şûna ku bang lê bikin, bi ser mala wî de digirin. Bê hiqûqî kirine. Agahiyê rast nehatiye lêkolînkirin. Ez beraeta muwekîlê xwe dixwazim.”

Ozdogan piştî daxwaza dozger jÎ xwest ku dem bê dayîn. Şandeya dadgehê daxwaza parêzer qebûl kir û doz taloqî 5’ê adarê kir. ENQERE

Dikarî Biecibînî