KCD û TJA: Komploger têk diçin

TJA û KCD'ê diyar kirin ku hêzên komploger ên navneteweyî têk diçin û sîstema Rêberê Gelê Kurd Abdullah OCalan jî li cîhanê belav bûye

Tevgera Jinên Azad (TJA) û Kongreya Civaka Demokratîk (KCD) bi wesîleya salvegera komploya navneteweyî ya li dijî Rêberê Gelê Kurd Abdullah Ocalan, daxuyanên nivîskî weşandin.

Di daxuyaniya xwe de TJA’yê diyar kir ku sîstema Ocalan a konfederal, azadîparêziya jinê, ekolojîk û demokratîk ku weke alternatîfa sîstema netewe dewletan a faşîst hate afirandin, ji bo gelê kurd û gelên Rojhilata Navîn rê li ber serdemeke nû vekir û wiha got: “Vê pêngavê kir ku têkoşîna azadiyê ya gelê kurd di asta gerdûnî û herêmî de bibe pêşeng. Şoreşa Rojava encama berbiçav a vê yekê ye.”

Di daxuyaniyê de hate destnîşankirin ku bersiva herî dîrokî ya ji komployê re bê dayîn, parastina şoreşa jinê ya Rojava ye û bang li tevahî hêzên demokratîk hat kirin ku ji bo şikandina tecrîd û pêkhatina azadiya Ocalan têkoşîneke hevpar bê meşandin.

‘Komploger di nav çiravê de ne’

KCD’ê jî ragihand ku bi berxwedan û têkoşîna dîrokî ya gelê kurd a bi pêşengiya perspektîfa neteweya demokratîk, berxwedan û îradeya Ocalan komploya navneteweyî hatiye têkbirin.

KCD’ê diyar kir ku komploger niha di nava çirava Rojhilata Navîn de têk diçin û wiha got: “Têkoşîna Azadiyê ya Kurdistanê jî bi felsefeya xwe ya azadiyê û armanca jiyana azad veguherî hêviya rizgariya gelên Rojhilata Navîn.”

Di daxuyaniyê de hate ragihandin ku hêzên komploger nasekinin, hewldanên xwe yên komployê û tasfiyekirina Têkoşîna Azadiyê dewam dikin û daxuyanî wiha hat bidawîkirin: “Azadiya Birêz Ocalan û Rêbertiya wî ya di nava şert û mercên azad de, azadiya gelê me ji bo me sedema jêneveger a têkoşînê ye.” AMED

Dikarî Biecibînî