Kongreya HDP’ê dest pê kir

4’emîn Kongreya Asayî ya HDP’ê dest pê kir. Di axaftinên kongreyê de hat destnîşankirin ku dê ev kongre bibe kongreya hêvî û yekitiyê

Li Enqereyê 4’emîn Kongreya Asayî ya Mezin a HDP’ê li Eywana Sporê ya Arenayê destpê kir. Beriya bijartina dîwanê axaftina vekirinê Cîgirê Hevserokên HDP’ê Azad Bariş kir û wiha got: “Îro em hevdîtinek pir watedar pêk tînin. Wê ev kongreya me ji her kesî re bibe bersivek xurt. Em silavê xwe ji her aliyê Kurdistan, Tirkiye û cîhanê re dişînin. Em carek din hemû hevrêyên xwe silav dikin. Em soz didin we dê HDP bi ser bikeve û gel bi ser bikeve.”

Piştî axaftina Bariş, ji bo kongreyê dîwan hat bijartin. Ji bo hevserokatiya dîwanê parlamenterê HDP’ê yê Êlihê Mehmet Ruştu Tiryakî û Parlmantera HDP’ê ya Edeneyê Tulay Hatîmogûllari hatin bijartin.

Tiryakî û Hatîmogûllari axivîn û wiha gotin: “Em kongreya xwe di serdemek ku hemû azadiyên me û mafên mirovan bûne kangren pêk tînin. Feqîrî zêde dibe. Tundiya li dijî jinan zêde dibe. Di pirgirêka kurd de bêçareserkirin û tundrewî zêde dibe. Vê zîhniyeta ku pirsa kurd çareser nake, li dijî Iraq û Sûriyeyê şer daye destpêkirin û şer ji bo gelan rewa dibîne. Em wek gelan ne bêçare ne. Çare di hêza demokrasiyê û di yekitiya wan de ye. Hêz di sînerjiya ku bi afirîne de ye.

Silav ji berxwedêrên li Îmraliyê, Kandira û Edîrneyê û hemû berxwedêrên li zindanên li welat re. Silav û hezar silav li we.

Kongreya me wê hêvî û yekitiyê bi xwe re bîne.”

Di kongreyê de ji bo kesên di têkoşîna azadî û demokrasiyê de jiyana xwe ji dest dane rêz hat girtin.

Kongre bi axaftina Hevserokên HDP’ê Sezaî Temellî û Pervîn Bûldan didome.

Hezar û 18 heb delegeyên tomarkirî yên HDP’ê hene. Delege rojek berê hatin Enqereyê. Wê îro di kongreyê de hevserokên HDP’ê û rêveberiya wê were bijartin. ENQERE

Dikarî Biecibînî